توركیا چەند مەرجێكی بۆ دەستپێكردنەوەی هەناردەی نەوتی هەرێم داناوە
سەباح سوبحی ئەندامی لیژنەی نەوت و گازی پەرلەمانی عێراق ئاشكرای دەكات، شاندی توركی كە بە سەرۆكایەتی هاكان فیدان وەزیری دەرەوەی توركیا هاتووەتە عێراق چەند مەرجێكیان بۆ دەستپێكردنەوەی هەناردەی نەوتی هەرێمی كوردستانی عێڕاق بە رێی توركیا خستووەتەڕوو.
دوێنێ سەباح سوبحی پەرلەمانتاری پارتی لە لێدوانێكی رۆژنامەوانی كە لە ماڵپەڕی سۆمەریە نیوز بڵاوكراوەتەوە، ئاشكرای كردووە شاندی توركی كۆمەڵێك مەرجی بە عێراق داوە، كە ژمارەیان شەش مەرجە، بۆ ئەوەی هەناردەی نەوتی هەرێمی كوردستانی عێڕاق دەستپێبكاتەوە. لەوانە تێچووی گواستنەوەی بۆ هەر بەرمیلێك 13 دۆلار بە توركیا بدرێت.
مەرجێكی تر ئەوەیە عێراق سكاڵاكەی خۆی كە لە لیژنەی ناوبژیوانی سەربە ژووری بازرگانی نێودەوڵەتی لە پاریس كردوویەتی، بكێشێتەوە. جیا لەمەش حەقی كۆمپانیای نەوتی توركی بۆ هەر بەرمیلێك حەوت دۆلاری پێ بدرێت، نەوتی هەرێمی كوردستانی عێڕاق و كەركووكیش بە یەكەوە رەوانە بكرێت.
لە 25ی ئاداری رابردووەوە هەناردەی نەوتی هەرێمی كوردستانی عێڕاق بۆ بەندەری جیهانی توركی وەستاوە، ئەمەیش بەهۆی بڕیارێكی لیژنەی ناوبژیوانی سەربە ژووری بازرگانی نێودەوڵەتی لە پاریس، چونكە بەگوێرەی بڕیارەكە نابێت توركیا بێ رەزامەندی وەزارەتی نەوتی عێراق رێككەوتنی نەوتی لەگەڵ هەرێمی كوردستانی عێڕاق بكات.
