دوای تێپەڕبوونی زیاتر لە شەش ساڵ ئاوارەکانی شنگال نەگەڕاونەتەوە بۆ زێدی خۆیان
دوای تێپەڕبوونی زیاتر لە شەش ساڵ بەسەر ئازادکردنەوەی شنگال، تائێستا زۆرینەی دانیشتوانەکەی نەگەڕاونەتەوە شوێنەکانیان، بەرپرسێکی وەزارەتی کۆچ و کۆچبەرانیش چەند ھۆکارێک بۆ نەگەڕانەوەی ئاوارەکان دەخاتەڕوو.
بەرپرسێکی وەزارەتی کۆچ و کۆچبەرانی عێراق بە ماڵپەڕی عەرەبی جەدیدی راگەیاندوە، مانەوەی گروپە چەکدارییەکان لە شنگال، ئەنجامنەدانی ئاشتەوایی کۆمەڵایەتی راستەقینە، دابیننەکردنی خزمەتگوزارییە بنەڕەتییەکان بەتایبەت ئاو، کارەبا و رێگەباون و ھەوڵنەدان بۆ رەخساندنی ھەلیکار بۆ دانیشتوانی شنگال، چوار گەورەترین ھۆکارن کە وایکردووە ئاوارەکان نەگەرێنەوە شارەکەیان .
لای خۆشیەوە سامی فەیسەڵ، بەڕێوەبەری لقی نەینەوای نوسینگەی مافی مرۆڤی نەتەوە یەکگرتووەکان دەڵێت، چارەسەرکردنی دۆسیەی ئاوارەکانی شنگال ئاڵۆز بووە دوای ئەوەی حکومەتە یەک لە دوای یەکەکانی عێراق نەیانتوانیوە چارەسەری بکەن.
ئاماژە بەوەش دەکات، لەئێستادا دۆخی شنگال رەھەندێکی سیاسی وەرگرتووە و چارەسەرکردنیشی ئاڵۆز بووە.
