ھەڵۆ _٤٤
هێزی ئاسمانیی ئەرتەشی کۆماری ئیسلامیی ئێران پەردەی لەسەر یەکەم بنکەی ئاسمانیی ژێرزەمینیی خۆی بە ناوی« ھەڵۆ _٤٤ » لادا.
بنکەی هێزی ئاسمانیی «هەڵۆ_٤٤»ی ئەرتەشی ئێران توانای وەرگرتن و ئامادەکردنی ھەموو جۆرە فڕۆکەیەکی ڕاوکردن و بۆمب ھاوێژو هەروەها خۆفڕی هێزی ئاسمانیی ئەرتەشی ھەیە.
جێگای ئاماژەیە «هەڵۆ_٤٤» یەکێکە لە چەندین مۆڵگەی ئاسمانیی ژێرزەوینیی هێزی ئاسمانیی ئەرتەشی ئێران، کە لە ماوەی ساڵانی ڕابردوودا ھاوتەریب لەگەڵ پێویستیی ئۆپەراسیۆنەکانی ئەم هێزە و ڕەچاوکردنی بنەماکانی «بەرگری شارستانی» لە ناوچە جیاوازەکانی وڵاتدا دروستکراوە.
دروستکردنی ئەم بنکانە لە شوێنی جیاوازدا ھاوتەریب لەگەڵ پێداویستییەکان و بە ئاستێکی بەرزی سەلامەتی و ھێمنایەتی بە سەرنجدانی دیزاین و دروستکرانی لەژێرشاخەکان دا، بەستێن بۆ ڕاپەڕاندنی ئۆپەراسیۆنی لەناکاوو خافڵگیرانەو چاوەڕوان نەکراوی دوژمن خۆش دەکات. ئەم بنکانە ھەروەھا بە ڕاگرتنی فڕۆکەشەڕکەرەکان لە جێگاگەلی ھێمن و تەیارکردنیان بە سیستێمی شەڕی ئلێکترۆنی ، بۆمب و موشەک، لەوانەش موشەک گەلی یاسین، قائیم و ئاسەف ، ھەلی ئۆپراسیۆنی دووراودوورو زیادکردنی مەودای ستراتیژی بۆ ئەنگاوتنی ئامانجگەلی دوورەدەستی ڕەخساندووە.
هێزی ئاسمانیی ئەرتەشی کۆماری ئیسلامیی ئێران لە ماوەی ساڵانی ڕابردوودا توانیویەتی لە ڕووی هێزو توانای هێرش بردنەوە خۆی بە باشی بەهێز کات.
ئەم دەستکەوتە نوێیە لە هەل و مەرجێکدا مسۆگەر کراوە کە پیشەسازیی بەرگریی ئێران لەژێر گەمارۆو بایکۆت دایە، بەڵام ئەمڕۆ کۆماری ئیسلامیی ئێران لە بواری بەرهەمهێنانی کەرەستەی بەرگریی وەک موشەک، سیستەمی بەرگریی ئاسمانی، فڕۆکەی بێفڕۆکەوان، چەکی سووک و قورس، پاپۆڕشکێنی چەند هەزارتۆنی و هەموو جۆرە فڕۆکەیەکی شەڕکەر و ژێردەریایی بووەتە هێزی یەکەمی ناوچەکە. ھەر ئەم توانایەش لە مەڕ بەرهەمهێنان و کەڵک وەرگرتن لە چەک و کەرەستەی شەڕ، وایکردووە ھەتا کۆماری ئیسلامیی ئێران لە لایەکەوە لە ڕووی بەرهەمهێنانی ئاسایشی خۆیدا بە تەواوی ڕەسەن و خۆماڵی بێت و لە لایەکی دیکەوە ئاستێکی بەرزی ڕێگریکردن و بەرپەرچدانەوە بەدەستبهێنێ، بەجۆرێک کە ئێستا دوژمنان زۆر باش لەوە تێگەییشتوون کە هێرشی سەربازی بۆ سەر ئێران سادە و بێ تێچووی قورس نابێت.
ھەر لەم پەیوەندییەدا سەرداری سەرلەشکری پاسدار «محەمەد باقری» سەرۆکی ئەرکانی گشتیی هێزە چەکدارەکانی ئێران لە کاتی بەسەر کردنەوەی بنکەی هێزی ئاسمانیی «هەڵۆ_٤٤»ی ھێزی ئاسمانیی ئەرتەشی ئێران، بە جەختکردنەوە لەسەر بەردەوامبوونی پرۆسەی بنیاتنانی بنکە ستراتیژییەکان، ڕایگەیاند: ڕەوتی دروستکردنی بنکەی سەلامەت کە ئەم بنکەیە یەکێکە لە چەند نموونەیەکیان، بەردەوام دەبێت بۆ ئەوەی دوژمن زیاتر و زیاتر لە بارەی لەشکرکێشانی سەرکەوتووانە بۆ سەر وڵاتەکەمان ھیوابڕاو ببێت و هێزی ڕێگریکردنمان بەهێزتر و سەقامگیرتر و بەردەوامتر ببێت بۆ دابین کردنی ئاسایش و ئەرخەیانیی گەلی ئێران.
خاڵێکی گرنگی دیکە سەبارەت بە بنکەی ئاسمانیی «هەڵۆ_٤٤» ئەوەیە کە ئەم بنکەیە دەکەوێتە ژێر شاخەکانەوە کە زۆرێک لە بۆمباکان کاری تێ ناکەنن و توانای پاراستنی ئامێر و چەکی ستراتیژی هێزی ئاسمانی هەیە؛ بۆیە ئەم تایبەتمەندییە دەبێتە هۆی زیادبوونی بارستایی ئۆپەراسیۆنی لەشکریانی ئێران بۆ سەرکوتکردنی دوژمنان.
فەکتەرێکی دیکە کە توانای بەرگریی ئێرانی لە ئۆپەراسیۆنە ئاسمانییەکان بەرزتر کردووەتەوە سیستەمی دژە مووشەکییە، لە ئێستادا ئێران لە ڕیزی ئەو چەند وڵاتەی جیهانە کە بە پشت بەستن بە توانا ناوخۆییەکانی پێشکەوتووترین سیستەمی بەرگریی دژە مووشەکیی بەرهەم هێناوە، لەوانەش ئەم سیستەمانە کە ناوی (باوەڕ ٣٧٣)ـە کە لە ڕووی مۆدێلی (S-300)ی ڕووسی دروست کراوە، بەڵام زۆر پێشکەوتووترە و کاری پاراستنی گرنگترین بەشەکانی وڵات، لەوانە هەندێک لە بنکە ئەتۆمییەکانی لە ئەستۆیە.
ئاشکرایە کە دەسەڵاتی بەرگریی کۆماری ئیسلامیی ئێران ھاوتەریب لەگەڵ هەڕەشەو گوڕەشەی دوژمنان بەرەوپێش دەچێت، بەجۆرێک کە لە ٩٠٪ پشتبەستن بە کەرەستەی سەربازیی بیانی ھەتا پێش سەرکەوتنی شۆڕشی ئیسلامی، ئێستا گەیشتووەتە ٩٠٪ خۆبژێوی لە بەرهەمهێنانی چەکی پێویست؛ بنکەی ئاسمانیی «هەڵۆ_٤٤» بە یەکێک لە گرنگترین و ستراتژی ترین بوارەکانی پەرەپێدانی چەکەمەنیی ئێران دادەنرێت کە ئاستێکی بەرزی لە ڕووی ڕێگری و بەرپەرچدانەوەو بەرەڤانی کردن بۆ وڵات بە دیاری هێناوە.
