دیداری وەزیری دەرەوەی عەرەبستان لەگەڵ سەرۆکی موساد
ھەڵسوڕاوی ناوداری سەعودی لە پەیامێکی توییتێڕی دا باسی دیداری وەزیری دەرەوەی عەرەبستانی سەعودی و سەرۆکی ڕێکخراوەی شۆڤاریی ڕژێمی زایونی واتە موسادی کرد لە ئەمریکادا.
موجتەھید ھەڵسوڕاوی ناوداری سەعودی ڕۆژی چوار شەممە بە بڵاو کردنەوەی وێنەیەک لە دانیشتنی تاقمی ناسراو بە یەکێتیی دژی ئێرانی ناڤۆکی، لەپەیجی توییتێڕەکەی دا نووسی:عادڵ جۆبەیر وەزیری دەرەوەی عەرەبستان و یوسی کوھێن سەرۆکی ڕێکخراوەی شۆڤاریی ڕژێمی زایونی «موساد» ڕۆژی سێ شەممە لە پەراوێزی ئەو دانیشتنەدا چاویان بە یەکتر کەوت.
موجتەھید وتووشیەتی: ئەم دیدارە فەرمیانە بۆ ئاسایی کردنەوەی پەیوەندییەکانی عەرەبستان لەگەڵ ڕژێمی زایونی ڕووی لە پەرەسەندن ناوەو لە ماوەی ڕۆژانی داھاتوودا عەرەبستان ھەواڵی پڕلەشەرمی ئاسایی کردنەوەی پەیوەندییەکانی لەگەڵ ڕژێمی داگیرکەری قودس ڕادەگەیەنێت.
بنکەی عەرەبیی ٢١ یش لەم دواییەدا نووسیویەتی: بنیامین ناتاتنیاھۆی سەرۆک وەزیرانی ئیسرائیل ھەر دەرفەتێک دەقۆزێتەوە ھەتا بەوپەڕی شانازییەوە بڵێت کە ئاسایی بوونەوەی پەیوەندییەکانی ئیسرائیل لەگەڵ وڵاتانی عەرەبی و بە تایبەت عەرەبستانی سەعودی گەییشتووەتە قۆناغی پێشکەوتن .
ئەم بنکەھەواڵدەرییە نووسیویەتی: ئیسرائیل گەڵاڵەی سازانی عەرەبیی پێ قەبووڵ ناکرێت و ھەروەھا نەیاری ھەر ڕێگاچارەیەکیشە کە پێکھاتنی دوو دەوڵەتی لێ بکەوێتەوە. ئەمەش بەو وتایەیە کە ئیسرائیل بەدوای ھاوبەشێکی عەرەبی دا دەگەڕێت کە لەبارچوونی یەکجاریی کێشەی فەلەستین قەبووڵ کات ھەتا ئیسرائیل مۆڵەتی ئەوەی دەست کەوێت کە ھەوڵی پاوانخوازیی زیاتر بدات.
هێزەکانی داگیرکەری ڕژێمی زایونی هەموو ڕۆژێک بە هەڵکوتانەسەر ناوچە جۆربەجۆرەکانی فەلەستین کەرتی ڕۆژئاوای چۆمی ئەردەن و قودسی پیرۆز، لاوانی فەلەستینی ڕاپێچ دەکەن و هێندێک جاریش بەبێ هیچ تاوانێک زیندانییان دەکەن.نزیکەی حەوت هەزار فەلەستینی لە نالەبارترین هەل و مەرج دا لە بەندیخانەکانی ڕژێمی زایونی بەسەر دەبەن.
ئەنجومەنی ئاسایشتی ڕێکخراوەی نەتەوەکان ئۆکتۆبەری 2016 بە دەرکردنی بڕیارنامەیەک شارۆچکەسازییەکانی ڕژێمی زایونی لە سەرزەوییە داگیرکراوەکانی فەلەستینی ئیدانە کرد. بە پێی ئەم بڕیارنامەیە، ڕژێمی زایونی ئەرکمەند دەکرێت بەوەی کە دەستبەجێ و بەتەواوی واز لە چالاکییەکانی لە بواری شارۆچکەسازی لە سەرزەوییە داگیرکراوەکانی فەلەستین لەوانە قودسی پیرۆز بهێنێ .
کۆڕو کۆمەڵە نێونەتەوەییەکان و وڵاتانی جیهانیش گەلێک جار داوایان لە ڕژێمی زایونی کردووە کە کۆتایی بە داگیرکردنی زەوییەکانی فەلەستین بهێنێ، کەچی ئەم ڕژێمە بەردەوام بە بێ ئەوەی ئەو داخوازییانەی کۆمەڵگای جیهانی بە هەند بگرێت، لە سەر داگیرکردنی سەرزەوی و داپڵۆساندنی فەلەستینییەکان بەردەوامە.
