داخوازی یەمەن لە ئەنجومەنی ئاسایشی نەتەوە یەکگرتووەکان
وەزارەتی دەرەوەی یەمەن داوای لە ئەنجومەنی ئاسایشی نەتەوە یەکگرتووەکان کرد بە بڕیارنامەیەک کە جێبەجێ کرانی پێویست بێ، کۆتایی بێنێ بە شەڕ و گەمارۆی یەمەن.
بە پێی ڕاپۆرتی ئیرنا؛ وەزارەتی دەرەوەی یەمەن ڕۆژی پێنجشەممە رایگەیاند؛ یەمەن بە ڕووانگەیەکی ئەرێنیەوە کاردانەوەی نیشان داوە بە گەڵاڵەی جۆر بەجۆر بۆ دامەزراندنی ئاشتی و لە هەموو ئەو دانوستانانەی کە لە ساڵانی ڕابردوودا بەڕێوە چووە، بەشداری کردووە.
وەزارەتی دەرەوەی یەمەن ڕاشکاوانە ڕایگەیاند: ڕێبەری سیاسیی یەمەن بۆ پاراستنی خوێنی جەماوەر، بەردەوام لە داخوازەکانی خۆی پاشگەز بۆتەوە، بەڵام ئەم مەسەلەیەش هەر نەبۆتە هۆی ئەوەی ڕادەی پەلامار و جەنایەتەکانی دەسدرێژکارانی سەعوودی کەم ببێتەوە.
لە بەیاننامەی وەزارەتی دەرەوەی یەمەن هاتووە؛ ئەنجومەنی ئاسایشی نەتەوە یەکگرتووەکان دەبێ ئەرک و بەرپرسایەتییەکانی خۆی بەرامبەر بە یەمەن بە کردەوە جێبەجێ بکات، لەبەر ئەوەی کە ئەوەی ئێستا لەم وڵاتە ڕوو دەدات، ئاسایش و ئاشتیی نێودەوڵەتیی دەخاتە مەترسییەوە و لە ئاراستەی قازانج و بەرژەوەندیی نێودەوڵەتیدا نییە.
وەزارەتی دەرەوەی یەمەن جەختی کرد: ئەنجومەنی ئاسایشی نەتەوە یەکگرتووەکان دەبێ لە ڕێگای پەسەن کرانی بڕیارنامە، کۆتایی بێنێ بە دەسدرێژکاری، گەمارۆ و قەدەغەی کەل و پەل بۆ یەمەن، و بوار خۆش کات بۆ کرانەوەی بەندەرەکان و فڕۆکەخانەکان بەتایبەت فڕۆکەخانەی سەنعا و بە گرتنە بەری تەگیبری پێویست پێش بە تیاچوونی ئابووریی یەمەن بگرێ.
شەڕی عەرەبستان دژ بە یەمەن و گەمارۆی داسەپێندراوی ئەم وڵاتە کە لە مارسی ٢٠١٥ دەست پێ بووە، نالەبارترین کارەساتی مرۆیی لە جیهانی بە دواوە بووە، تا رادەیەک کە ٧٥%ی جەماوەری یەمەن پێویستیان بە یارمەتیی مرۆیی هەیە و ١٤ ملوێن یەمەنی لە مەترسیی برسێتی و قات و قڕیدان.
هەر ١٠ خولەک منداڵێکی یەمەنی دەمرێ و ٨٠%ی خەڵکی یەمەن لە ژێر هێڵی هەژاریدا دەژین و دراوی نیشتمانی ئەم وڵاتە ٢٣٥%ی بایەخی خۆی لە دەست داوە.
