وەزیری دەرەوەی یەمەن : لە سۆڤیەتی پێشوو موشەکمان وەرگرت بوو نەک لە ئێران
ھشام شەرەف عەبدوڵڵا وەزیری دەرەوەی دەوڵەتی ڕزگاریی نیشتیمانیی یەمەن وێڕای ڕەت کردنەوەی بانگەشە پڕوپوچەکانی ئەمریکا پێی داگرت: وڵاتەکەی چەکی لە ئێران وەرنەگرتووەو موشەکە باڵستیکەکانی یەمەن ساڵانی کۆن لە یەکێتیی سۆڤیەتی پێشوو وەرگیردراون.
بە پێی ڕاپۆرتی ڕۆژی پێنج شەممەی ئیرنا، وەزیری دەرەوەی دەوڵەتی ڕزگاریی نیشتیمانیی یەمەن لە وتووێژێکدا لەگەڵ کەناڵی سی ئێن ئێن لە بارەی بانگەشەکەی نیکی ھێڵی نوێنەری لەکارکشاوەی ئەمریکا لە ڕێکخراوەی نەتەوەکان لە بارەی دەستوەردانی ئێران لە یەمەن ڕایگەیاند کە یەمەن ئەو موشەکانەی ساڵانی کۆن لە ڕووسەکان وەرگرتووەو نۆژەن و ھێزمەندی کردوون ھەتا بتوانێ بەرەڤانی لە خۆی بکات.
وەزیری دەرەوەی دەوڵەتی ڕزگاریی نیشتیمانیی یەمەن پێی داگرت: ئێرانییەکان ھیچ موشەکێکیان بە یەمەن نەداوەو بە تەواوی دنیاش ڕادەگەیەنین کە دەتوانین بەو موشەکانە ھەتا ساڵانێکی دوورودرێژ لەگەڵ ڕژێمی دالی سەعوددا بە شەڕ بێین.
نیکی ھێڵی نوێنەری لەکارکشاوەی ئەمریکا لە ڕێکخراوەی نەتەوەکان ١٤ی دیسامبەری ٢٠١٧ بانگەشەی کرد بوو کە ئێران موشەک بە یەمەن دەدات.
عەرەبستانی سەعودی وێڕای پێکهێنانی هاوپەیمانی لەگەڵ بڕێک لە وڵاتانی عەرەبی ناوچەکە لە شەشەمی خاکەلێوەی ساڵی 94ی کۆچیی هەتاوییەوە شاڵاوێکی بەربڵاوی دژی یەمەن دەست پێ کردووە بۆ ئەوەی لەم ڕێگایەوە بتوانێ عەبدڕەبەمەنسور هادی سەرۆک کۆماری لەکارکشاوەو هەڵاتووی یەمەن بگەڕێنێتەوە بۆ سەردەستەڵات کە ئەم شاڵاوانە کاول بوونی یەمەن و قەڵاچۆی هەزاران مرۆڤی بێ دەرەتان بەولاوە هیچ ئەنجامێکی دیکەی بۆ ڕژێمی سەعودی بەدواوە نەبووە.
لە ئەنجامی هێرشەکانی عەرەبستان بۆ سەر یەمەن کە لە مارسی دووهەزارو پانزدەوه دەستی پێ کراوە پتر لە یانزە هەزار کەسی سڤیل کوژراون و ملوێنان شارومەندی یەمەنیش هەڵوەداو ئاوارە بوونە. ئەم شاڵاوانە هەروەها زەبرێکی قورسیشی لە ژێرخانە سەرەکییەکانی یەمەن لەوانە ناوەندەکانی تەندروستی و دەرمان وەشاندووە.
