عەلی قەرەداغی: ئاساییکردنەوەی پەیوەندیی لەگەڵ ئیسرائیل حەرام و خیانەتە
د.عەلی قەرەداغی، ئەمینداری گشتیی یەکێتی جیهانیی زانایانی موسڵمان ئیدانەی ئاساییکردنەوەی پەیوەندیی وڵاتان لەگەڵ ئیسرائیل دەکات و دەڵێت "حەرامە و خیانەتێکی گەورەیە".
د.عەلی قەرەداغی لە نوێترین لێدوانی ڕۆژنامەوانیدا رایگەیاند"بەردەوام لەگەڵ ئەقسا و قودس و فەلەستین دەمێنینەوە و دژی داگیرکاری و ئاساییکردنەوەی پەیوەندییەکانین لەگەڵیدا، ئەو کارە لەلایەن هەر دەوڵەت یان گرووپێکەوە بێت، دەبێت سەرکۆنە بکرێت".
ئەمینداری گشتیی یەکیەتی جیهانیی زانایانی موسڵمان وتیشی "ئەوەی هەندێک لە وڵاتانی وەکو ئیمارات و مەغریب دەستیان داوەتێ لە رۆچوونە پەیوەندیی و هەنگاوە کردەییەکان لەگەڵ کیانی زایۆنیی داگیرکەر، کارێکی سەرکۆنەکراوە و لەڕووی شەرعەوە حەرامە ".
هەروەها قەرەداخی ئاماژەى بەوەشکردوە، یەکێتی جیهانیی زانایانی موسڵمان پێشتر چەندین ڕاگەیەندراوێکی بۆ ئیدانەکردنی ئاساییکردنەوە لەگەڵ داگیرکارانی قودس و ئەقسا و فەلەستین دەرکردووە و چەندین کۆنگرە و سیمیناری گرتووە بۆ دووپاتکردنەوەی لەپێشترێتی ئەم پرسە و حەرامیی ئاساییکردنەوەی پەیوەندییەکان، کە خیانەتێکی گەورەیە.
ساڵى رابردوو ژمارەیەک وڵاتى عەرەبی پەیوەندییەکانیان لەگەڵ ئیسرائیل ئاساییکردەوەو بەنێوەندگیرى ئەمریکا رێکەوتنیان ئەنجامداوە.
