ئەمینداری گشتیی وەزارەتی پێشمەرگەی حکوومەتی هەرێمی کوردستانی عیراق ئاماژە بەوە دەکات زانیاری لەسەر هەبوونی چەکی کیمیاوی لەلایەن داعشەوە هەیەو لەوبارەیەوە هاوپەیمانانیش ئاگادار کراونەتەوە.

جەبار یاوەر ڕاگەیاند: “هاوپەیمانان نموونەی ئەو گوللانەیان بردووە کە داعش بەهاوەنەوە ئاراستەی پێشمەرگەیان کردووە لە دەرەوە و لە تاقیەگەکانی دەرەوە دەرکەوتووە کە داعش چەکی کیمیاوی جۆری کلۆر و خەردەلی بەکارهێناوە لە زۆر ناوچە، وەک (کەرکووک، بەشیر، گوێڕ، مەخموور و باشیک)”. ئەوەشی ئاشکرا کرد: “نوێنەری هاوپەیمانان وێنە و نموونەی ئەو پاشماوانەیان بردووە و سەلماندوویانە کە ئەمە چەکی کیمیاوییە و خۆشیان باش ئاگاداری داعشن کە چەکی کیمیاوی بەکار دەهێنن”.

جەبار یاوەر ئەوەشی ڕوون کردەوە: “جگە لە نوێنەری هاوپەیمانان، تیمێکی وەزارەتی بەرگریی عێراق هاتووە و پشکنینی ناوچەکە و بریندارەکانی کردووە، ئەوانیش ڕاپۆرتیان بە وەزارەتی پێشمەرگە داوە کە داعش چەکی کیماوی هەیە و ئاگاداری نەتەوە یەکگرتووەکان و سەرجەم ئەو وڵاتانە کراوە کە لێرە هاوکاریی پێشمەرگە دەکەن".

ئەوەشی خستە ڕوو، چەکی کیمیاوی لەلایەن داعشەوە لە چوارچێوەی مووسڵدا دروست دەکرێت. دەشڵێت: “زانیاریمان لەسەر شوێنی دروستکردنی چەکەکە نییە، ئەگەر زانیاریمان هەبێت، ئەو کاتە شوێنەکانمان دەدایە هاوپەیمانان، ئەوانیش بۆردومانیان دەکرد”.