کۆنگرەکەی یەکێتی دواخرا
کۆنگرەی یەکێتی نیشتیمانیی کوردستان بۆ ماوەی دو حەوتە دوا دەخرێت و (٢١)ی ئەم مانگە دەبەسترێت.
بەپێی ڕاپۆرتی کەناڵی ئاسمانیی سەحەر بەگێڕانەوە لە ماڵپەڕی سبەی، لە کۆبونەوەی ئەمڕۆی ئەنجومەنی سەرکردایەتی یەکێتی نیشتیمانی کوردستاندا بڕیاردرا، کۆنگرەی حیزبەکە بۆ ماوەی دوو حەوتە دوابخرێت و رۆژی (٢١)ی ئەم مانگە ببەسترێت.
میدیاکانی یەکێتی وایان بڵاوکردووەتەوە کە؛ رۆژی نۆی مانگ کۆنفرانسی مەڵبەندەکان ئەنجام دەدرێت و رۆژی بیست و یەکەمی ھەر ئەم مانگەش کۆنگرە دەبەسترێت. ئەوەش لەکاتێکدایە کە ئەنجومەنی سەرکردایەتی و مەکتەبی سیاسیی یەکێتی لیژنەیەکی باڵایان بۆ چوارەم کۆنگرەی یەکێتی پێکهێناوە و بڕیار وابوو دوای کۆنفرانسی کۆمیتەکان، کۆنفرانسی مەڵبەندەکان ئەنجام بدرێت و رۆژی حەوتەمی ئەم مانگەش کۆنگرەی چوارەم بەڕێوە بچێت.
وەک لە ڕاپۆرتەکەدا ھاتووە، هەر ئەمڕۆ ژمارەیەک لە ئەندامان و کادێرانی یەکێتی، هاوکات لەگەڵ بەڕێوەچونی کۆبوونەوەی سەرکردایەتی، خۆپیشاندانێکی ناڕەزایەتییان لەبەردەم بینای مەکتەبی سیاسیی یەکێتی لە سلێمانی ئەنجامدا و داوایانکرد بەر لە کۆتایی ئەمساڵ کۆنگرەی حیزبەکەیان ببەسترێت.
