سەرۆکی پارتی دیموکرای کوردستانی عێراق لە پەیامێکدا بۆ مەرجەعی باڵای شیعەکانی عێراق ، داوای چاکبوونەوەی بۆ کرد .

نوسینگەی مەسعود بارزانی لە  ئاگاداریەکدا رایگەیاند ، بە دوای  ئەنجامدرانی نەشتەرکاری بۆ ئایەتوڵڵا سیستانی مەرجەعی باڵای شیعەکانی عێراق ، بارزانی لە پەیامێکدا بۆ بنەماڵەی سیستانی ،  پەیجۆری باری تەندروستی ئەو بووە .

 بارزانی لەم پەیامەدا لە درگای خواوەند داوای چاکبوونەوەی بۆ ئایەتوڵڵا سیستانی خواستووە .

کۆسرەت رەسوڵ عەلی ‎سەرۆکی ئەنجومەنی باڵای سیاسی و بەرژەوەندی یەکێتیی نیشتمانیی کوردستانیش پەیامێکی ئاراستەی عەلی سیستانی مەرجەعی باڵای شیعەکانی عیراق کرد و تێیدا هیوای تەندروستی بۆ خواست .

لە پەیامەکەی کۆسرەت رەسوڵدا هاتووە "‎لە هەواڵی تەندروستی جەنابتان دەپرسم و داواکارم لەخوای گەورە شیفای بەخێرتان بداو تەندروستیتان بەرەو باشی بچێ بۆ خزمەتی گەلی عیراق."

ئایەتوڵڵا عەلی سیستانی دوێنێ پێنجشەممە بەهۆی شکانێک لە رانیدا نەشتەرگەری بۆکرا و دواتر بڵاو کرایەوە کە نەشتەرگەرییەکە سەرکەوتوو بووە.