جەماوەری شاری سلێمانی لە خۆپیشاندانێکدا دژی ھێرشەکانی تورکیا بۆ سەر ھەرێمی کوردستان، وێڕای ھەڵدانی دروشمی «سوپای تورکیا بۆ دەرەوە»، ڕایانگەیاند کە ، مەبەستى تورکیا پەکەکە نییە، بەڵکو بە نیازی داگیرکردنى هەرێمى کوردستانەو نایەوێت بگەڕێتەوە.

بە پێی ڕاپۆرتی کەناڵی ئاسمانیی سەحەر بە گێڕانەوە لە ماڵپەڕی «ھیوای کورد»ەوە،ئەمڕۆ پێنج شەممە سەدان هاوڵاتى لە شارى سلێمانىی ھەرێمی کوردستانی عێراق لەبەردەم باخى گشتىی شارەکە لە دژى لەشکرکێشانى سوپاى تورکیا بۆسەر خاکى هەرێم خۆپیشاندانیان کردو ناڕەزایەتى خۆیانیان دەربڕی.

لە جەنگەی خۆپیشاندانەکەی جەماوەری شاری سلێمانی دژی ھێرشەکانی تورکیا ،هەرچەندە هێزەکانی ئاسایشت هەوڵیان دا بڵاوە بە خۆپیشاندەران بکەن، بەڵام خەڵک بە تین و گوڕێکی زیاترەوە لە سەر ئەو ھەڵوێستەیان بەردەوام بوون و ھەوڵی دامرکاندنەوەی خۆپیشاندانەکەشیان لە لایەن ھێزەکانی ئاسایشتی حکوەتی ھەرێمیان بە دروشمی «بمرێ خیانەت» وەڵام دایەوە.

خۆپیشاندەران وێڕای شەرمەزار کردنی ئەوهێرشانەى تورکیا داواى هەڵوێستى بەبڕشتانەی  حکومەتى عێراق و هەرێم و کۆمەڵگەى نێو دەوڵەتىشیان کرد لەمەڕ ڕاگرتن و دیاری کردنی سنورێک بۆ هێرشەکانى تورکیا .

خۆپیشاندەرانی شاریس سلێمانی وێڕای ھەڵدانی دروشمی «بمرێ خیانەت»، «بۆ دەرەوە بۆ دەرەوە، سوپای تورکیا بۆ دەرەوە» و چەندین دروشمی دیکە، هۆشدارییان دا لەوەى کە مەبەستی ئەو ھێرشانەی سوپاى تورکیا پەکەکە نییە، بەڵکو بەنیازی داگیرکردنى خاکى هەرێمى کوردستانەو نایەوێت بگەڕێتەوە.