ناوەندێکی نێودەوڵەتی دارایی و بازرگانی لە سلێمانی دەکرێتەوە
پارێزگاری سلێمانی رایگەیاند، بۆ یەکەمجار لەسەر ئاستی عێراق و هەرێم ناوەندێکی نێودەوڵەتی بۆ دابینکردنی پاڵپشتی دارایی لە پرۆژە بچووک و مامناوەندەکان دەکرێتەوە و لە رێگەیەوە خاوەنکارەکان یەکدەخرێن و هەلی کاری زیاتر بۆ گەنجان دەڕەخسێنرێت.
ئەمڕۆ پێنجشەممە، هەڤاڵ ئەبوبەکر پارێزگاری سلێمانی لە کۆنفرانسێکی رۆژنامەنووسیدا رایگەیاند، بۆ یەکەمجار لەسەر ئاستی عێراق و هەرێم ناوەندی نێودەوڵەتی بۆ دابینکردنی پاڵپشتی دارایی و پرۆژەی بازرگانی بچووک بەئامانجی رەخساندنی هەلی کار بۆ گەنجان لە پارێزگای سلێمانی دەکرێتەوە.
پارێزگار ئاماژەی بەوەکرد، ئەمە یەکەم سەنتەرە لەسەر ئاستی عێراق و هەرێم کە لەو بوارەدا دەکرێتەوە و خاوەنکارەکان یەکدەخات و بە ئامانجی رەخساندنی هەلی کار بۆ گەنجان کاردەکات.
باسی لەوەشکرد، لەڕێگەی ئەم ناوەندەوە و بە هاوکاری دەستەی مامەڵەی دراو و بانکی ناوەندی عێراق پەرە بە پرۆژە بچووک و مامناوەندەکان دەدرێت و پاڵپشتی داراییان لێدەکرێت.
ئەوەشی خستەڕوو، ئەم ناوەندە دەتوانێت پارێزگای سلێمانی بخاتە قۆناغێکی ئابووری گرنگەوە کە تاکو ئێستا ئەو پارێزگایە بە بنەمای ئاسایش و ئارامی ئابووریی ناسراوە.
