هه‌فته‌ى داهاتوو باران و به‌فر ده‌بارێت
شاره‌زایه‌كى كه‌شناسى رایده‌گه‌یه‌نێت، هه‌فته‌ى داهاتوو تاوه باران و بروسكه ناوچه‌كانى هه‌رێمى كوردستان ده‌گرێته‌وه و له لوتكه‌ى به‌شێك له شاخه‌كانیش به‌فر ده‌بارێت.
ئه‌مڕۆ شاڵاو هیدایه‌ت، شاره‌زاى كه‌شناسى رایگه‌یاند، “هه‌فته‌ى داهاتوو حاڵه‌تى تاوه‌باران و هه‌وره بروسكه ناوچه جیاوازه‌كانى هه‌رێمى كوردستان ده‌گرێته‌وه و پله‌كانى گه‌رما 3 بۆ 4 پله دابه‌زین به‌خۆیانه‌وه ده‌بینن و خێرایی با زیادده‌كات له‌كاتى تاوه بارانه‌كاندا”.
ئه‌و شاره‌زایه‌ى كه‌شناسى له‌باره‌ى ده‌ستپێكى شه‌پۆله‌كه ئه‌وه‌شى خستووه‌ته‌ڕوو، “پێشبینی دەکەین لەمەودای 15 بۆ 16ی مانگى تشرینى یه‌كه‌م، بەزۆریش 16ى مانگ تاکاتی جیای 17ی مانگ بەهۆی کارتێکردنی نزمە پاڵەپەستۆیەکی دەریای ناوەڕاست بۆ ناوچەکە حاڵەتێکی تری تاوە باران و بروسک بەشێوەی ناسەقامگیری کەشوهەوا ناوچە جیاوازەکان بگرێتەوە بەکاریگەری و بڕی جیاواز. هەروەها، لەم حاڵەتەشدا ئەگەری کەمێک بەفر لە لوتکەی شاخاویه زۆر بەرزەکانی هاووسنوور بە ئێران و تورکیا هەیە”.
به وته‌ى شاڵاو هیدایه‌ت، “رۆژی هه‌ینى کەشوهەوا زیاتر خۆرەتاو و ساماڵ دەبێت”.
