هەردوو حزبی دەسەڵاتداری هەرێم بەرپرسیارن لە قەیرانی مووچەی فەرمانبەران
نوێنەری تورکمانی پێشووی هاوپەیمانیی دەوڵەتی یاسا لە ئەنجومەنی نوێنەرانی عێراق، هەردوو حزبی دەسەڵاتداری هەرێمی کوردستانی بە سەبەبکاری قەیرانی مووچەی فەرمانبەرانی هەرێم زانی و وتی: ئەم دوو حزبە پارە لە بەغدا وەردەگرن و لە نێوان خۆیان دابەشی دەکەن.
جاسم محەممەد جەعفەر لە چاوپێکەوتنێکدا ڕایگەیاند: هەردوو پارتی دەسەڵاتدار لە هەرێمی کوردستانی عێراق واتە پارتی دیموکرات و یەکێتی نیشتمانی لە بەغدا پارە وەردەگرن و لە نێوان خۆیان دابەشی دەکەن، بەشێک لەو پارەیەش دەنێرن بۆ وڵاتانی ئەوروپایی و وڵاتانی دیکەیش.
ئەم نوێنەرە تورکمانەی پێشووی پەرلەمانی عێراق وتیشی: مووچەی فەرمانبەرانی هەرێمی کوردستان دەبێ ڕاستەوخۆ لە لایەن بەغداوە بدرێت و نابێ ئەم مووچەیە بۆ هەولێر بنێرن.تا بەم شێوە پێش بگیردرێ بە گوێرزانەوەی پارەی مووچەی فەرمانبەران بۆ دەرەوەی عێراق لە لایەن دوو پارتی دەسەڵاتداری هەرێمەوە.
جاسم محەممەد جەعفەر ڕایگەیاند: زۆربەی بانکەکان لەوان بانکی بیانیش لە هەرێمی کوردستان کار دەکەن، بەڵام کاتێک باسی کرانەوەی لقی بانکە حکومییەکانی عێراق لە هەرێم دەکرێت، هەولێر نەیارەتی دەکات و کار کردن لەگەڵ ئەو جۆرە بانکانە بە قەدەغە ڕادەگەیەنێت.
