دوابەدوای هەستانی لافاو و کەوتنە ژێرئاوی چەند گوندێکی سەر بە شاری سەلماس لە پارێزگای ئازەربایجانی ڕۆژاوا، چەند تیمی فریاگوزاری سەر بە ڕێکخراوی مانگی سوور بە بەشداری چەندین فریاگوزار خۆیان گەیاندە ناوچە لافاولێکەوتووەکان و فریای خەڵک کەوتن.

 دوا بە دوای هەستانی لافاو و کەوتنەژێر ئاوی ڕێگاوبان و ماڵەکانی گوندەکانی سەر بە شاری سەلماس، گوندەکانی شۆڕک، سیلاڤ، کانیگەنی، شەکەریازی و مافی کەند گرفتێکی قورسیان بۆ درووست ببوو، هەربۆیە هێزەکانی فریاگوزاری ڕێکخراوی مانگی سوور خۆیان گەیاندە ناوچەکە. بەداخەوە  لەم لافاوەدا ٣ کەس گیانیان لە دەست داوە و کە بریتین لە کچێکی تەمەن ١٠ ساڵ و دوو پیاوی ٤٥ و ٧٣ ساڵ تەمەنی خەڵکی گوندی کانیگەنی. هەروەها بەپێی ڕاپۆرتەکان ٣ کەسیش لەم گوندەدا بریندار بوونە و ١ کەسیش لەلایەن فریاگوزارانی مانگی سوورەوە و دوو کەسی دیکەیش لەلایەن هێزەکانی ئۆرژانسەوە گوێزراونەتەوە بۆ ناوەندە دەرمانییەکان. بە پێی دوایین ڕاپۆرتەکان، هەڵمەتەکانی فریاگوزاری، هەڵسەنگاندنی بارودۆخی بنەماڵە زیانلێکەوتووەکان و دابەشکردنی پێداویستی و گەیاندنی یارمەتی لەلایەن ڕێکخراوی مانگی سوور لە ناوچە لافاولێکەوتووەکانی سەر بە شاری سەلماس ئێستایش هەر بەردەوامە.