باڵوێزخانەی ڕووسیا لە تاران بەیاننامەیەکی دەرکرد سەبارەت بە دەنگۆی ئەوەی کە گوایە ڕووسیا دیپلۆماتەکانی لەگەڵ پسپۆڕان و کارناسانی خۆی لە هێزگەی ئەتۆمی بووشێهر لە ئێران بردووەتە دەرەوە.

لە بەیاننامەکەی باڵوێزخانەی ڕووسیا لە تاران سەبارەت بە دەنگۆی لە ئێران چوونەدەری دیپلۆماتەکان و هەروەها کارناسان و پسپۆڕانی ڕووسیی هێزگەی ئەتۆمیی بووشێهر لە ئێران هاتووە: "سەبارەت بەو ڕاپۆرتانەی لە هەندێ میدیای دژبەردا بڵاو بۆتەوە  کە گوایە دیپلۆماتەکان و فەرمانبەرانی باڵوێزخانەی ڕووسیا و پسپۆڕان و کارناسانی هێزگەی ئەتۆمی بووشێهر خەریکن لە ئێران دەبرێنە دەرەوە، ڕادەگەیەنین کە نە فەرمانبەرانی باڵوێزخانە و نە کارناسانی ڕووسیی هێزگەی ئەتۆمیی بووشێهر هیچ کامەیان خەریکی بەجێهێشتنی ئێران نین. باڵوێزخانەی ڕووسیا لە تاران جەختی کردووەتەوە کە چالاکییەکان بە پێی ڕەوتی هەمیشەیی و ئاسایی بەردەوامە و بانگەشەکانی تر دوورن لە ڕاستییەوە و زانیاریی هەڵەن کە سەرچاوەشیان تەواو ڕوون و ئاشکرایە.