بۆچوونی هێنری کیسینجەر سەبارەت بە ڕێککەوتنی نێوان ئێران و عەرەبستان
وەزیری دەرەوەی پێشووترو ستراتژیستی بەناوبانگی ئەمریکی، نێوەندگیریی چین لە ڕێککەوتنی ئێران و عەرەبستانی بە هۆکاری گۆڕینی دەسەڵاتی دیپلۆماسی لە سیستەمی نێودەوڵەتی دا زانی.
کۆماری ئیسلامیی ئێران و عەرەبستان ڕۆژی هەینی حەوتەمی مارس لە پەکینی پایتەختی چین لە سەر ئەوە ڕێککەوتن کە پاش حەوت ساڵ پەیوەندییە دیپلۆماسییەکانیان ببووژێننەوە.
بەگوێرەی ڕێککەوتنی تاران و ڕیاز، وەزیرانی کاروباری دەرەوەی ئێران و عەرەبستان وێڕای چاوپێکەوتنی یەکتر ئەوپەڕی لە ماوەی دوو مانگدا بەستێن بۆ گۆڕینەوەی باڵوێزەکان و کردنەوەی باڵوێزخانە و هەروەها ڕاپەڕاندنی مەرجەکانی دیکەش بۆ دەستپێکردنەوەی پەیوەندییەکان خۆش دەکەن.
عەرەبستان ڕۆژی ٣ی ژانویەی ٢٠١٦، بە بیانووی هێرشکردنە سەر باڵوێزخانە و کونسوڵخانەی ئەو وڵاتە لە تاران و مەشهەد، پەیوەندییە دیپلۆماسییەکانی لەگەڵ ئێران پچڕاند.
بەگوێرەی ڕاپۆرتی هەواڵدەریی فارس، "هێنری کیسینجەر"، وەزیری پێشووتری دەرەوە و ستراتیژیستی بەناوبانگی ئەمریکی، ڕێککەوتنی نێوان ئێران و عەرەبستانی بە گۆڕانکارییەکی بنەڕەتی لە دۆخ و پێشهاتەکانی ناوچەی ڕۆژئاوای ئاسیا ناوبرد.
«کیسینجەر» ئاماژەی بەوەشکرد، دەرکەوتنی پەکین وەک ناوبژیوانی ئاشتی لە درێژخایەندا دەسەڵاتی دیپلۆماسی لە سیستەمی نێودەوڵەتیدا دەگۆڕێت و چیتر ئەمریکا بە هێزێکی تەواو دادەنرێت بۆ نێوەندگیری کردنی نێوان وڵاتان و چینیش ئێستا داوای پشکی خۆی لەم بوارەدا دەکات.
«کیسینجەر» ڕاشیگەیاند کە لە ساڵانی ئەم دواییەدا چین بەدوای بەشداریکردن لە نەزمی نوێی جیهانیدا دەگەڕێت، هەروەها ڕوونیشی کردەوە کە ڕێککەوتنی نێوان ئێران و عەرەبستان لە ڕێگای پەکینیشەوە ھەر گێڕانی وەھا ڕۆڵێکە.
