چوارچێوەی هەماهەنگی : تورکیا درێژە بە تەماحکاریەکانی ئەدات و بەنیازی چوونەدەر لە عێراق نییە
ئەندامێکی چوارچێوەی هەماهەنگی عێراق جەختی کرد کە تورکیا تەماحکارییەکانی خۆی لە نەینەوا و کەرکووک بەردەوام دەکات و بەنیازی چوونەدەر لە عێراق نییە .
عەقیل ڕەدینی ئەندامی چوارچێوەی هەماهەنگی عێراق ( هاوپەیمانیی دەسەڵاتدار ) جەختی کرد تورکیا هەروا درێژە ئەداتە تەماحکارییەکانی لە خاکی عێراق و چاوی تەماحی بڕیوەتە پارێزگاکانی نەینەوا و کەرکووکیش . ناوبراو وتی: سەرەڕای هەموو داخوازییە فەرمی و جەماوەرییەکان بۆ کۆتایی دان بە ئامادە بوونی سەربازیی تورکیا لە باکووری عێراق ، تورکیا تا ئێستا هیچ کاردانەوەیەکی جیدی بۆ پاشەکشێ کردن نیشان نەداوە . ڕەدینی وتیشی : تورکیا دۆخی سیاسی و ئاسایشی دەقۆزێتەوە بۆ مسۆگەرکردنی دەسکەوتە جوگرافیایی و ئابووریەکانی لە ناوچە باکورییەکان بە تایبەت لە مووسڵ و کەرکووک . ڕەدینی وتیشی درێژەی بێ دەنگ بوون لە هەمبەر جموجوڵەکانی تورکیا پێگەی عێراق لاواز دەکات . ناوبراو جەخت دەکات لەسەر پێویستی جم و جوڵی دیپلۆماسی و ئاسایشی یەکپارچە کە پێش بگرێ بە درێژەی دەسوەردانی ئانکارا لە کاروباری ناوخۆی عێراق .
