یوسف محەمەد ، ئەندامی باڵای بزووتنەوەی گۆڕان داوای هەڵوەشاندنەوەی گۆڕان دەکات
سەرۆکی پێشووی پەرلەمانی کوردستان و ئەندامی پێشووی پەرلەمانی عێراق لە فراکسیۆنی گۆڕان داوای هەڵوەشاندنەوەی حیزبەکەی دەکات.
یوسف محەمەد سەرۆکی پێشووی پەرلەمانی کوردستان و ئەندامی پێشووی پەرلەمانی عێراق لە فراکسیۆنی گۆڕان لە لێدوانێکدا دەڵێت: وەک وەفایەک بۆ رێکخەر و دامەزرێنەری کۆچکردووی کورد نەوشیروان مستەفا پێویستە بزووتنەوەی گۆڕان هەڵبوەشێندرێتەوە.
ئەم لێدوانەی یوسف محەمەد لەکاتێکدایە بڕیارە 26ی ئەم مانگە بزووتنەوەی گۆڕان کۆنفڕانسی خۆڕێکخستنەوە ببەستێت و هاوکات رێکخەری نوێش کە ناوی چیا نەوشیروان مستەفا دەهێندرێت هەڵببژێردرێت.
ئەمەش دوای پێکهێنانی دەستەیەکی 7 کەسی دێت بۆ رێبەرایەتی گۆڕان تا بەستنی کۆنفڕانس و پێش ئەم دەستەیەش لیژنەیەکی دیکە دوای شکستی هەڵبژاردنەکانی ئۆکتۆبەر پێکهاتبوو.
بەرپرسانی گۆڕان دەڵێن ئەوان خۆیان رێکدەخەنەوە و دەچنەوە سەر رێچکەری کاری رابردوویان.
