نەبیە بڕی:گەڕانەوەی سوریا بۆ کۆمکاری عەرەبی پەنجەرەیەکی هیوایە بۆ هاوکاریی هاوبەشی نوێ
سەرۆکی پەرلەمانی لوبنان جەختی لەوە کردەوە کە،گەڕانەوەی سوریا بۆ کۆمکاری عەرەبی و ئاوڕدانەوەی عەرەبەکان لە سوریا، پەنجەرەیەکی هیوایە بۆ دەستپێکردنی هاوکارییەکی نوێی هاوبەشی عەرەبی.
بەپێی ڕاپۆرتی ڕۆژی دووشەممەی سپۆتنیک؛ «نەبییە بڕی» سەرۆکی پەرلەمانی لوبنان ڕایگەیاند: بڕیاری کۆمکاری عەرەبی بۆ ئاوڕدانەوە لە سوریا ، هەنگاوێکی دروستە بەرەو یەکڕیزی و یەکگرتنی وڵاتانی عەرەبی.
بڕی وتیشی: گەڕانەوەی سوریا بۆ کۆمکاری عەرەبی چەند ساڵێک دواکەوت، بەڵام هەنگاوێکی دروستە بەئاراستەی باشترکردنی دۆخی وڵاتانی عەرەبی، کە تەنها لەڕێگەی یەکڕیزییەوە مسۆگەر دەبێت.
پێشتر «ئەحمەد ئەبولغەیت» ئەمینداری گشتیی کۆمکاری عەرەبی ڕایگەیاندبوو: حکومەتی سوریا لە سەرجەم کۆبوونەوەکانی کۆمکاری عەرەب و ڕێکخراوە ناوچەییەکانی ئامادە دەبێت و «بەشار ئەسەد»ی سەرۆکی سوریاش دەتوانێت بەشداری لە کۆبوونەوەی داهاتووی سەرکردەکانی عەرەب بکات.
