ڕۆژی ٢١ی بانەمەڕی ڕابردوو، یەکەمین نەشتەرگەریی موتوربەکردنی مۆخی ئێسک لە بەشی چاندنی مۆخی ئێسک لە نەخۆشخانەی بیعسەتی سنەی ناوەندی پارێزگای کوردستانی ئێران بە سەرکەوتوویی بۆ منداڵێکی تەمەن ٨ ساڵان کە توشی وەرەمی «ویلمز» ببوو، ئەنجامدرا.

لەمبارەیەوە دکتۆر «بورهان مورادوەیسی» کە بەرپرسی تیمی چارەسەری ئەم نەشتەرگەرییە بووە ڕایگەیاندووە کە: موتوربەکردنی مۆخی ئێسک یەکێکە لە شێوازە نوێیەکانی چارەسەریی نەخۆشانی شێرپەنجە، ئەمەش هیوای چاکبوونەوەی ئەو جۆرە نەخۆشانەی زیاتر کردووە.

ناوبراو بۆ ڕوونکردنەوەی ئەم نەشتەرگەرییە وتیشی: ئەم کوڕە هەشت ساڵانە ڕۆژی ١٤ی خاکەلێوەی ئەمساڵ تووشی وەرەمی «ویلمز» بووە و وەک یەکەم نەخۆش لە بەشی موتوربەکردنی  ئێسک لە نەخۆشخانەی بیعسەتی لە شاری سنە وەرگیرا.

وتیشی: ئەم منداڵە دوای کۆتایی ھاتنی سەرکەوتووانەی خولی چارەسەرییەکەی و ڕاھێنانی پێویست لەمەڕ ڕەچاو کردنی تەندروستی و ئاگاداریی لە خۆی  لە ئێستادا گەڕاوەتەوە بۆ ماڵ و ژیانی ئاسایی خۆی بەردەوام دەکات.