شاندێکی ئۆپۆزیسیۆنی تورکیا بۆ لێکدانەوەی ھاوکاریی سەربازی لەگەڵ سووریا سەردانی دیمەشق دەکات.

بە پێی ڕاپۆرتی ئاژانسی هەواڵدەریی سپۆتنیک، «دۆغو پرینچێک»، سەرۆکی پارتی ئۆپۆزسیۆنی "وەتەن"ی تورکیا ڕایگەیاند: بە مەبەستی لێکۆڵینەوە لە هاوکارییە سەربازییەکانی نێوان هەردوو وڵات لە دژی ڕێکخراوە تیرۆریستییەکان، سەردانی سووریا دەکەم.

«پرینچێک» وتیشی: ئێمە هیچ زانیارییەکی ئەوتۆمان لەبارەی ئەم گەشتە نەداوە بە حکومەتی تورکیا، ناشزانین ڕازی دەبێت یان نا، بەڵام پلانمان هەیە پێش گەشتەکە بۆ دیمەشق کۆبوونەوەیەک لەگەڵ حکومەت بکەین و زانیاریی پێویستی بدەینێ.

سوپای تورکیا بە بیانووی بەرەنگاربوونەوەی تیرۆریستان، نزیکەی دوو ساڵ و نیوە بەشێک لە باکوور و باکووری ڕۆژهەڵاتی سووریای داگیر کردووەو تا ئێستاش گرووپێک لە سەربازانی تورکیا لەو ناوچانەدا بەسەر دەبەن.

حکومەتی سوریا ھەتا ئێستا گەلێک جار ناڕەزایی دەربڕیوە بەرامبەر بە بوونی لەشکریانی تورکیا لە سوریا.