ڕێکخراوی بەڕێوەبردنی قەیران و کارەساتە سروشتییەکانی تورکیا (ئافاد) بڵاویکردەوە، ژمارەی کوژراوانی بوومەلەرزە ترسناکەکەی ئەو وڵاتە ھەڵکشاوە.

ڕۆژی دووشەممە ٦ی فڤریەی ئەمساڵ دوو بوومەلەرزەی بەهێز ناوچەیەکی فراوانی باشووری تورکیا و باکوری سوریای هەژاندو بەهۆیەوە دەیان هەزار کەس گیانیان لەدەستدا و زیانی بەرفراوان بە باڵەخانەکان کەوت.

بەگوێرەی ڕاپۆرتی هەواڵدەریی ڕادیۆو تەلەفزیۆن، ئێوارەی ڕۆژی سێ شەممە ڕێکخراوی بەڕێوەبردنی قەیران و کارەساتە سروشتییەکانی تورکیا (ئافاد) ڕایگەیاند کە ژمارەی ئەو کەسانەی بەهۆی بوومەلەرزەکەی ئەم وڵاتە گیانیان لەدەستداوە بۆ ٤٢ هەزار و ٣١٠ کەس ھەڵکشاوە.

لە بەیاننامەیەکدا ئافاد هەروەها بەردەوامیی ناردنی خێمەی بۆ ناوچە بوومەلەرزەلێدراوەکانی تورکیا ڕاگەیاند و وتیشی، تا ئێستا ٣٠٠ هەزار و ٨٠٩ خێمە لەو ناوچانە دانراون و لێقەوماوانی بوومەلەرزەکە لەو ناوچانە جێگیر کراون.

هەروەها بەپێی ڕاگەیاندنی ئەم ڕێکخراوەیە لە ٢٧٠ شوێنی ناوچە زیانلێکەوتووەکانی بوومەلەرزە خێمە دانراون.