ڕێوڕەسمی ڕێپێوانی یەومەڵای ١٣ی خەزەڵوەر، ڕۆژی نیشتمانیی بەرەنگاربوونەوەی ئیستکباری جیهانی، سەر لە بەیانیی ئەمڕۆ بە دروشمی سەرەکیی (پەیمان لەگەڵ شەهیدان، شەڕ لەگەڵ زاڵمان) بە ڕێزگرتن لە یاد و بیرەوەریی ڕێبەری موجاهیدی شەهید، خوێندکاران و مامۆستایانی شەهیدی میناب و لامرد، لە مەیدانی فەلەستینی تاران بەڕێوە چوو.

١٣ی خەزەڵوەر، کە هەمان ڕۆژی قوتابییە، ئەمساڵ بەناو و یادی خوێندکارانی شەهیدی خوێندنگەی شەجەرەی تەیبەی میناب مانایەکی جیاوازی بە خۆوە گرتووە. ١٣ی خەزەڵوەری ئەمساڵ تەنیا وەبیرهێنەرەوەی ڕۆژی خوێندکار نییە، بەڵکوو لە ڕاستیدا وەبیرهێنەرەوەی ئەو منداڵانەشە کە بە جانتا و کۆڵەپشتیی ڕەنگاوڕەنگ و کتێبی تازە و جیهانێک ئاواتی منداڵانەوە بەڕێکران بۆ خوێندنگە، بەڵام هەرگیز نەگەڕانەوە. ڕێپێوانی ١٣ی خەزەڵوەری ئەمساڵ وەک هەموو ساڵێکی دیکە، هاوکات لەگەڵ تاران، لە سەرانسەری ئێرانیشدا بەڕێوە چوو. لە زیاتر لە ٩٠٠ شار و گوندی ئێراندا، خوێندکارانی خوێندنگەکان و زانکۆکان و بنەماڵەی شەهیدان لە تەنیشت توێژەکانی دیکەی خەڵکەوە بە دروشمی (پەیمان لەگەڵ شەهیدان، شەڕ لەگەڵ زاڵمان) کۆبوونەوە تا پەیامی یەکێتی و بەرخۆدانی گەلی ئێران بەرامبەر بە زاڵمان و زۆردارانی جیهان بخەنە بەرچاو.