جەختی مۆسکۆ لە سەر پەرە پێ دانی پەیوەندی لەگەڵ ئێراندا
وتەبێژی وەزارەتی دەرەوەی ڕووسیا جەختی کرد: سەرباری ھەڕەشەو گوڕەشەکانی ئەمریکا، پەیوەندییەکانمان لەگەڵ کۆماری ئیسلامیی ئێران پەرە پێ دەدەین.
بە پێی ڕاپۆرتی ئیرنا، «ماریا زاخارۆڤا» وتەبێژی وەزارەتی دەرەوەی ڕووسیا ڕۆژی پێنج شەممە وتی: ئەمریکا ڕایگەیاندووە کە مەبەست لە ھەنگاوەکانی واشێنگتۆن پێشگرتن بە ھاوکاریی وڵاتان لەگەڵ ئێرانە، بەڵام ڕووسیا لە سەر ھاوکارییە تەکنیکی و سەربازییەکانی لەگەڵ ئێران بەردەوام دەبێت.
وتەبێژی وەزارەتی دەرەوەی ڕووسیا وتیشی: مۆسکۆو تاران لە بوارە نێونەتەوەییەکانی وەک دانوستانی ئاستانە بۆ چارەسەریی بارگرژی و ناکۆکییەکانی سووریاش پێکەوە ھاوکاری دەکەن.
ئەم کاربەدەستە ڕووسیە وتیشی: پرسی بەرنگار بوونەوەی نەخۆشیی «کۆڤیدی_١٩» بەردەوام لە لایەن سەرکردەکانی ئێران و ڕووسیاوە بە گرینگی چاوی لێ دەکرێت.
ناوبراو وتیشی: ئێران و ڕووسیا لە سەر بەشداریی بەکەڵکی بەرامبەریان بەردەوام دەبن و ئەو بارستاییە بەرفراوانەیان بەکار دێنن.
