بۆ چارسەری قەیرانی دارایی عێراق داوای وەرگرتنەوەی قەرزەکانی سەر هەرێم دەکرێت
لیژنەیەکی پەڕلەمانی عێراق پێیوایە یەکێک لە ڕێگاکانی زیادکردنی داهاتەکانی دەوڵەتی عێراق و دابینکردنی مووچەی فەرمانبەران بێ پەنابردن بۆ قەرزکردنی ناوخۆیی دەرەەکی ، بریتییە لە وەرگرتنەوەی ئەو قەرزە کەلەکەبووانەی لەئەستۆی هەرێمی کوردستانن.
میدیای شارپرێس راپۆریدا ، نەدا شاکر جەودەت ئەندامی لیژنەی ئابووری و وەبەرهێنان لە ئەنجوومەنی نوێنەرانی عێراق لە کۆبوونەوەیەکی نێوان لیژنەی دارایی و یاسایی و لیژنەی ئابووری و وەبەرهێنان لە پەڕلەمانی عێراق، چەند پێشنیازێکی بۆ زیادکردنی داهاتەکان و کەمکردنەوەی خەرجییەکان و دەستەبەرکردنی مووچەی فەرمانبەران خستۆتەڕوو، لەناویاندا وەرگرتنەوەی قەرزەکانی ئەستۆی هەرێم و کەمکردنەوەی ژمارەی وەزارەتەکانی حکوومەت.
جەودەت ڕوونیکردۆتەوە کە چەند پێشنیازێک بۆ بابەتی زیادکردنی داهاتەکان خرانەڕوو، گرنگترینیان کەمکردنەوەی وەزارەت و پۆستەکان و وەرگرتنەوەی ئەو پارانەی حکوومەتی فیدراڵی کە لە ئەستۆی حکوومەتی هەرێمی کوردستاندان.
ئەندامەکەی لیژنەی ئابووری و وەبەرهێنان ئەوەشی وتووە کە چەند ڕێگایەکی تریش هەیە دەکریت بۆ زیادکردنی داهاتەکان پشتیان پێببەسترێت، وەک کۆکردنەوەی داهاتی دەروازە سنوورییەکان و زیادکردنی ئاشکرای فرۆشتنی دراو و داهاتە نەوتییەکان لەناوخۆدا.
باسی لەوەش کردووە کە هێشتا داهاتی باج و دەروازە سنوورییەکان لە داتاکانی حکوومەتدا نین ، بەڵکو تەنیا باسی داهاتەکانی فرۆشتنی نەوتی خاو دەکرێت.
