ھێرشی بە ڕۆکێت بۆ سەر باڵوێزخانەی ئەمریکا لە بەغدا
کانونی دوھەم 14, 2022 11:15 Asia/Tehran
سەرچاوە ئاسایشتییەکانی عێراق باسی ھێرشی بە ڕۆکێت بۆ سەر باڵوێزخانەی ئەمریکا لە ناوچەی سەوزی بەغدایان کردووە.
بەپێی ڕاپۆرتی کەناڵی تەلەگرامیی سابرین نیوز،بنکەی سێھەمی «ئەلتەوحیدە»ی باڵوێزخانەی ئەمریکا لە بەغدا پێتەختی عێراق ڕۆژی پێنج شەممە لە لایەن دەستەیەکی نەناسراوەوە بە دوو ڕۆکێت ھێرشی کرایە سەر.
دوابەدوای ئەو ھێرشانە تەواوی ڕێگاکانی چوونەژوورەوەی باڵوێزخانەکە داخرا. لەم پەیوەندییەدا گرتەیەکی ڤیدیۆیی وا دەردەخات کە سیستێمی بەرەڤانیی «سیرام»ی سوپای ئەمریکا بەبەردەوامی خەریکی بەرنگاربوونەوەی ڕۆکێتە ھاوێژراوەکانە.
جێگای ئاماژەیە کە ھێشتا ھیچ تاقمێکی خۆڕاگریی عێراق بەرپرسایەتیی ئەو ھێرشانەی بە ئەستۆ نەگرتووە.
