یەکسان بوونێک کە بردنەوە دەھاتە ئەژمار
لە خولەکی ٩٤ دا گوڵێک تۆمار کرا و دەرەنجامی یارییەکەی کرد بە یەکسان، بەڵام یەکسان بوونێک کە بۆ یایزانانی یانەی «سلێمانی» وەک بردنەوە دەھاتە ئەژمار.
بە پێی ڕاپۆرتی میدیا وەرزشییەکانی ھەرێمی کوردستان، لە دووھەم یاریی پاڵاوتنەکانی خولی یانە پلە یەکەکانی عێراق، «یانەی سلێمانی» لە یاریگای تایبەتی خۆی پێشوازی لە یانەی «پێشمەرگەی سلێمانی» کرد.
لەم یارییەدا تایمی یەکەم بە یەکسانبونی هەردوولا بە بێگۆڵ کۆتایی هات. لە تایمی دووھەمدا هەرچەندە «پێشمەرگەی سلێمانی» دەستپێشخەری کرد و گۆڵێکی تۆمار کرد، بەڵام لە دوا چرکەی یارییەکەدا و لە خولەکی ٩٤ «زەید محەمەد» گۆڵی بەرامبەری سلێمانی تۆمار کردەوە و لە ئەنجام دا یارییەکە بە یەکسانی و بە گۆڵێک بۆ هەر لایەک کۆتایی هات. ئەو یەکسان بوونەش بۆ یایزانانی «سلێمانی» وەک بردنەوە دەھاتە ئەژمار، چونکە تیپەکە لە سەرەتای دروستبوندایە و زۆربەی یاریزانەکان لە تیپی لاوان و ئەکادیمیای یانەی سلێمانیەوە سەرخراون بۆ تیپی یەکەم.
بەو یەکسان بوونە یانەی سلێمانی خاڵەکانی کردە چوار خاڵ و بەهاوبەشی لەگەڵ «سیروانی نوێ» و «نەورۆز» و «پێشمەرگەی سلێمانی» پلەکانی یەکەم تا چوارەمیان گرت کە ئەم سیانەی کۆتاییش خاوەنی چوار خاڵن.
