خاتونێکی وەرزشوانی ئێرانی میدالیای زێڕی پاڵەوانەتیی تێکواندۆی ئاسیای کردە مل
نوێنەری تێکواندۆی ئێران لە یەکەم ئەزمونی خۆی لە کێبەرکێکانی ئاستی تەمەنداران وێڕای سەرکەوتن بە سەر تەواوی خەنیمەکانی دا ، میدالیای زێڕی کێشەکانی ژێر ٤٦ کیلۆگرامی کێبەرکێکانی پاڵەوانەتیی ئاسیای بەخۆی تەرخان دا.
بە پێی ڕاپۆرتی ئیرنا، بیست و چوارەمین خولی کێبەرکێکانی پاڵەوانەتیی ئاسیا ٢٠٢١ی لوبنان بە ئامادە بوونی ١٨٩ تێکواندۆکار لە ٢١ وڵاتەوە ڕۆژی چوارشەممە لە ھۆڵی «نوھاد نوفال»ی بەیرووت دەستی پێکراو بۆ ماوەی سێ ڕۆژیش بەردەوام دەبێت.
«نیگار ئیسماعیلی» خاتوونێکی وەرزشوانی ئێرانی وێڕای سەرکەوتن بە سەر تەواوی خەنیمەکانی ، لەو پەڕی شیاوەتی دا لە سەر سەکۆی پاڵەوانەتیی ئاسیا وەستا.
«نیگار ئیسماعیلی» کە بۆ یەکەمجارە بەشداری لە کێبەرکێکانی تەمەندارانی ئاسیا تاقی دەکاتەوە، لە یەکەم ململانێی لەگەڵ «زیودا ئایریماتۆ» لە کازاخستانەوە بەرەوڕوو بووەوەو بە دەرەنجامی ٢٩ خاڵ لە بەرامبەر ٩ خاڵ بە سەری دا سەرکەوت. ناوبراو ڕووبەڕووی «ورۆنیکا گارسس»ی فیلیپینیی خاوەنی میدالیای برۆنزی پاڵەوانەتیی تازەلاوانی ئاسیاش بووەوەو ٢٢ بە ٤ سەرکەوتنی تۆمار کرد.
ئەم وەرزشوانە ئێرانیەی کێشی ژێر ٤٦ کیلۆگرامی لە قۆناغی پێش کۆتایی دا «شوخسانام ئازاموا»ی سەربە ئۆزبەکستانیشی ٢٨ بە ٧ بەزاندو گەییشتە قۆناغی کۆتایی. نیگار لە قۆناغی کۆتاییش دا «می ڕئو کانگ»ی نوێنەری کۆریای باشوری پاڵەوانی تازەلاوانی جیھان و ئاسیاشی ٣١ بە ٩ شکست پێ ھێناو ئا بەمجۆرە میدالیای زێڕی پاڵەوانەتیی ئاسیای لە مل کرد.
