کارتێکەریەکانی کۆرۆنا لەسەر رەوشی یاریەکانی تۆپی پێ لە ئەوروپا
تا دێت دۆخی کۆرۆنا له به‌ریتانیا و به‌دیاری کراو له نێو یانه‌کانی پریمه‌رلیگ زیاتر ده‌بێت، ئه‌مه‌ش بووه‌ته هه‌ڕه‌شه له‌سه‌ر به‌رده‌وامبوونی خوله‌که‌و ئاماده‌بوونی هانده‌ران له ناو یاریگا و هه‌موو ئه‌مانه‌ش تۆپی پێی ئینگلته‌را به‌ره‌و چاره‌نووسێکی نادیار ده‌به‌ن.
له‌ماوه‌ی رابردوودا دوای یاریکردن به‌رامبه‌ر به نۆرویچ سیتی ژماره‌یه‌کی زۆری یاریزانانی یانه‌ی تۆتنهام توشی کۆرۆنا بوون، به‌هۆی ئه‌مه‌ش یاری یانه‌که به‌رامبه‌ر به رین له یۆرۆپالیگ و دواتر برینتفۆرد له پریمه‌رلیگ دواخرا.
له‌دوای ئه‌وه یانه‌ی مانچسته‌ر یونایتد له‌سه‌ره‌تای ئه‌م هه‌فته‌یه به‌رامبه‌ر به یانه‌ی نۆرویچ سیتی یاری کرد و ته‌نها رۆژێک دوای ئه‌و یارییه راهێنانی یانه‌که هه‌ڵوه‌شێنرایه‌وه و راگه‌یه‌ندرا تووشبوون به کۆرۆنا له ناو یانه‌که هه‌یه، به‌ڵام هێشتا ژماره‌ی تووشبووان رانه‌گه‌یه‌ندراوه، به‌ڵام گومان له به‌ڕێوه‌چوونی یاری یانه‌که هه‌یه .
زیادبوونی توشبوون به کۆرۆنا له ریزی یانه‌کانی پریمه‌رلیگ مه‌ترسی گه‌وره‌یه بۆ سه‌ر داهاتووی خوله‌که‌و ئاماده‌بوونی هانده‌ران له یاریگاکانی ئه‌و خوله‌دا که زۆرێک پێیان وایه به‌ڕێوه‌چوونی یارییه‌کان له پشت یاریگای داخراوه‌وه وه‌کو کاره‌سات ده‌بێت بۆ خوله‌که و چه‌ند هه‌نگاوێک ده‌یباته دواوه.
وابڕیاره له رۆژی چوارشه‌ممه‌وه پلانی B حکومه‌تی به‌ریتانیا بچێته بواری جێ به‌جێکردنه‌وه و به‌پێی ئه‌و پلانه هه‌ر هانده‌رێک کارتی ڤاکسینی پێنه‌بێت بۆی نییه له یارییه‌کانی خوله‌که ئاماده‌بێت، له ئه‌گه‌ری نه‌بوونی کارتی ڤاکسینیش پێویسته به‌ڵگه‌ی ئه‌وه‌ی پێبێت که هه‌ڵگری ڤایرۆسی کۆرۆنا نییه.
