"قوباد تاڵەبانی" لە سلێمانی پێشوازی لە فیلمی سینەمایی "بێ نیشتمان"ی "توورج ئەسڵانی" کرد
"قوباد تاڵەبانی" لە سلێمانی پێشوازی لە فیلمی سینەمایی "بێ نیشتمان"ی "توورج ئەسڵانی" کرد
نمایشی گشتیی فیلمی سینەمایی "بێنیشتمان" (بی سرزمین) Landless لە نووسین، دەرهێنان و بەرهەمهێنانی سینەماکاری کورد "توورج ئەسڵانی"، لە کاتژمێر 9ی شەوی شەمە 2ی جوولای 2022 لە هۆڵی سەرەکی "سیتی سینەما" لە شاری سلێمانی پێتەختی کەلتووری و هونەری هەرێمی کوردستان بەڕێوەچوو و لە لایە بینەرانی ئامادەبوو لەم هۆڵە 600 کەسییە پێشوازییەکی بێوێنەی لێکرا.
نمایشی گشتی "بێ نیشتمان" بە بۆنەی جەژنی قوربانی پیرۆزەوە لە سینەمای شارە جۆراوجۆرەکانی هەرێمی کوردستان لە شاری سلێمانی دەستی پێکردووە و لە ڕۆژانی داهاتوو و لە درێژەی نمایشەکەی خۆیدا لە سینەما "ئێمپایر"ی "فامیلی مۆڵ" لە شاری هەولێر، لە سینەما "دهۆک مۆڵ" لە شاری دهۆک و لە سینەما "تایم سەنتەر" لە شاری کەرکووک لە هەرێمی کوردستان دەچێتە سەر پەردەی سینەماکان و هەروەها لە داهاتوویەکی نزیکیشدا لە گرینگترین شارە عەڕەبییەکان وڵاتی عێراق نمایش دەکرێت.
لە "بێ نیشتمان" سێیەمین بەرهەمی سینەمایی "توورج ئەسڵانی"دا، کۆمەڵێک لە ئەکتەرە ناودارەکانی وڵاتانی تورکیا، سووریا، عێراق و هەرێمی کوردستان، بە چوار زمانی کوردی، تورکی، عەڕەبی و فارسی تیایدا ڕۆڵیان بینیوە،
ئەم بەرهەمە سیەنەماییە لە یەکەمین نمایشی جیهانی خۆیدا لە بەشی "ئاسۆی سینەمای جیهان" لە سی و سێیەمین خولی فێستیڤاڵی نێودەوڵەتی فیلمی "سینەکۆئێست" Cinequest لە وڵاتی ئەمەریکا لە گرینگترین فێستیڤاڵە فیلمە سەربەخۆکانی دنیا و هەروەها فێستیڤاڵی باوەڕپێکراوی ئاکادیمیای ئۆسکار نمایش کرا.
