«میهران نیازی» گەنجێکی بۆکسێنکاری کوردی ئێرانی، ژمارەی پێوانەیی خێراترین بۆکسێنی جیهانی تۆمارکرد.

بە پێی ڕاپۆرتی هەواڵدەریی ڕادیۆوتەلەفزیۆنی ئێران، هاوکات لەگەڵ شەوی دێرینی یەڵدا،«میھران نیازی» لاوی سنەیی توانی ژمارەی پێوانەیی خێراترین بۆکسێن لە "گینس" دا بگۆڕێت و ئەم ناسناوە بە ناوی خۆیەوە تۆمار بکات.

ئەم مشتوەشێنە گەنجەی سەربە پارێزگای کوردستانی ئێران توانی بە تۆمارکردنی ٤١٤ وەشاندنی ڕاستەوخۆ لە ماوەی ٦٠ چرکەدا ژمارەی پێوانەیی «گینس» بشکێنێت کە پێشتر لەلایەن بۆکسێنکارێکی دیکەی ئێرانەوە تۆمارکرابوو.

خێراترین ژمارەی پێوانەیی بۆکسێنی جیهان بە ٤٠٣ وەشاندن لە خولەکێکدا پێشتر هی «یوسف ئیمانی» بۆکسێنکاری خەڵکی لوڕستانی ئێران بوو کە ساڵی ڕابردوو ناوی خۆی لە کتێبی «گینس»دا تۆمارکردبوو.

پێشتریش وەرزشوانێکی سلۆڤاکیا بە ٣٣٤ وەشاندنی یەک لە دوای یەک ناوی خۆی لە کتێبی ژمارە پێوانەییەکانی جیهاندا تۆمارکردبوو.