ڕێکارەکانی بەردەم رژێمی زایۆنی لە زمان بەرپرسێکی حەماس
بزووتنەوەی حەماس پێی داگرت؛ رژیمی زایۆنی دەیەوێ ڕێککەوتنێک بەدەست بێنێ بۆ پێک گۆڕینەوەی دیلە فەلەستینیەکان و گیراوانی زایۆنی وەک تاکە ئامانجی ، ئەوە لەکاتێکدایە کە ئەو بزووتنەوە، لەدووی ڕێککەوتنێکی تۆکمەیە کە تەنیا بەو مەسەلە، بەرتەسک نەبێتەوە.
"وەلید ئەلکەیلانی" بەرپرسی میدیایی بزووتنەوەی حەماس لە لوبنان وتی: ئیسرائیل تەنیا دوو بژارەی لەبەردەم دایە یان مامەڵەکردن لەگەڵ موقاوەمەو چاوپۆشی لە ئامانجەکانی شەڕ یان درێژەدان بە شەڕ و چوونەپێش بەرەو شەڕێکی درێژخایەن و بێ بڕانەوە.
ناوبراو وتیشی: نەتانیاهو لە دانوستانەکاندا لەپێناو هاتنەدی ئامانجە تاکەکەسییەکانی، تەگەرە دەنێتەوەو خوازیاری گەیشتن بە ڕێکارێک یان ئاگربڕ نیەو ئیرادەی سیاسیشی نیە.
ئەلکەیلانی وتیشی: شەرت و مەرجی حەماس بۆ مامەڵە لەگەڵ ئیسرائیل ڕوون وئاشکرایەو ئاگربڕ و پاشەکشەی بەتەواوەتی ئیسرائیل لە کەرتی غەززەو گەڕانەوەی ئاوارەکان بۆ باکوری غەززە مەبەستیەتی. ئەو هەنگاوانە، سەرەتایەکە بۆ چوونەنێو قۆناخی چوارەم واتە پێک گۆڕینەوەی دیلە فەلەستینیەکان و گیراوانی زایۆنیستی. بزووتنەوەی حەماس ڕەزامەندیی دەرنابڕێ لەگەڵ ڕێککەوتنێک کە ئەو شەرت و مەرجانە دابین نەکا.
