وەزارەتی تەندروستیی سعودیە رایگەیاند، ژمارەی ئەو کەسانەی تا ئێستا تووشی ڤایرۆسی کۆرۆنا بوون گەیشتە زیاتر لە 100 هەزار، هاوکات ژمارەی حاڵەتەکانی گیانلەدەستدانیش بەرەو زیادبوون دەچێت.

وەزارەتی تەندروستی سعودیە راشیگەیاند، لەسەرەتای بڵاوبوونەوەی ڤایرۆسەکەوە، ژمارەی توشبوون بەپەتاکە گەیشتووه‌تە 101 هه‌زار و 914 کەس، هه‌روه‌ک سێ هه‌زار و 54 کەسی تر تووشی ڤایرۆسەکە بوون، لەنێو وڵاتانی ناوچەی کەنداودا، ئەمە بەرزترین ژمارەیە کە لەو وڵاتە تۆمار دەکرێت.

وەزارەتی تەندروستی سعودیە راشیگەیاند: له‌ ماوه‌ی دوێنێدا 36 حاڵەتی گیانلەدەستدان تۆمارکراون، ئەوەش زۆرترین ژمارەی حاڵەتی گیانلەدەستدانە کە لەسەرەتای بڵاوبوونەوەی پەتاکەوە لەسعودیە تۆمار دەکرێت، بەوەش کۆی ژمارەی گیانلەدەستدان گەیشتە 712 کەس.هەروەها 72817 کەسیش چاکبوونەتەوە.

رۆژی هەینی دەسەڵاتدارانی سعودیە بۆ جارێکی دیکە رێوشوێنەکانی خۆپارێزی تەندروستییان لە شاری جدە بۆ ماوەی 15 رۆژ لەپێناو بەرگرتن لەبڵاوبوونەوەی ڤایرۆسی کۆرۆنا توندکردەوە، ئەو شارەی دەرگای هاتنەناوەوەی گەشتیارانە بۆ بەجێ‌ گەیاندنی رێوڕەسمەکانی حەج و عەمرە.

بەپێی رێوشوێنە خۆپارێزییە تەندروستییەکان لەشاری جدە، قەدەغەی هاتووچۆ لە شارەکە راگەیەنرا، سەرەڕای هەڵپەساردنی نوێژکردن لەمزگەوتەکان و داخستنی دووکان و بازاڕەکان.

دەسەڵاتدارانی سعودیە هەمان رێکارە تەندروستییەکان بەهۆی بەرزبوونەوەی حاڵەتە سەلمێنراوەکانی توشبوون بەڤایرۆسەکە لەشاری ریاز سەپاندووە.