شەهیدبوونی زیاتر لە ٥٠٠ لوبنانی لەئاکامی پەلامارەکانی رژیمی زایۆنی
وەزارەتی تەندروستیی لوبنان ئەمڕۆ چوارشەممە ڕایگەیاند، پتر لە ٥٠٠ هاووڵاتی لوبنانی لە ئەنجامی پەلامارەکانی رژیمی زایۆنیستی بۆسەر باشوری ئەو وڵاتە شەهید بوون.
وەزارەتی تەندروستیی لوبنان لەوبارەوە ڕایگەیاند، لە دەسپێکی شەڕەوە تائێستا لەئاکامی پەلامارەکانی رژیمی زایۆنیستی بۆسەر باشوری ئەو وڵاتە ٥٤٧ لوبنانی شەهید بوون.
بەپێی ڕاپۆری ماڵپەڕی ئەلعەهد، ئەو وەزارەتخانە هەروەها ئاماری بریندارانی ئەو پەلامارانەی هەزار و ٧٦٥ کەس ڕاگەیاند. لە دەسپێکی شەڕی غەززەوە تائێستا، خۆڕاگریی لوبنان بۆ پشتگریی و پاڵپشتی لە خەڵکی غەززەو خۆڕاگریی فەلەستین، باکوری سەرزەوینە داگیرکراوەکان دەکاتە ئامانج و ڕایگەیاندووە، هێرشەکانی تەنیا بە دامەزرانی ئاگربڕ لە کەرتی غەززە، رادەگیردرێ.
لەبەرامبەردا، سوپای رژیمی زایۆنیش لەو ماوەدا، پەلاماری جۆربەجۆری بۆسەر باشوری لوبنان ئەنجام داوە.
