بەرپرسێکی پارتی دیموکراتی کودستانی عێراق ئاشکرایکرد کە لەگەڵ حکومەتی عێراق رێککەوتوون دۆخی کەرکووک ئاسایی بکرێتەوە و یەکەم هەنگاویش وەرگرتنەوەی بارەگاکانیانە لەو شارە.

بە پێی راپۆری وێستگە نیوز ، شاخەوان عەبدوڵڵا ئەندامی لیژنەی ئاساییکردنەوەی دۆخی کەرکووک بۆ ماڵپەڕی فەرمی حزبەکەی ئەوەى ئاشکراکردووە کە ماوەیەکە گفتوگۆ لە نێوان هەرێم و بەغدا دەکرێت لەبارەی ئاساییکردنەوەی دۆخی کەرکووک و لە ئێستادا لەسەر کۆمەڵێک خاڵ رێککەوتوون، بە وتەی ئەو "ئێستا کاتی جێبەجێکردنیان هاتووە و حکوومەتی هەرێمی کوردستانیش فەرمانی بە ئیدارەی کەرکووک کردووە کە بارەگاکانی پارتی چۆڵ بکرێن و رادەستی بکەنەوە".

بە بڕوای شاخەوان عەبدوڵڵا گەڕانەوەی پارتی بۆ کەرکووک، سەنگ و قورسایی کورد بۆ شارەکە دەگەڕێنێتەوە، "بۆیە ئومێدەوارین رێککەوتنەکان جێبەجێ بکرێن بۆ ئەوەی ئێمەش بگەڕێینەوە".

ئەو بەرپرسەی پارتی وتیشی: ئێمە بە مەرج دەگەڕێینەوە بۆ کەرکووک، پێویستە بارەگاکانی ئێمە چۆڵ بکرێن و دەست بە هەنگاوەکانی دیکەی ئاساییکردنەوەی دۆخی کەرکووک بکرێت.