وتەبێژی حکومەتی ئێران: ئێران لەتەنیشت خەڵکی تورکیاو سوریایە
وتەبێژی حکومەتی ئێران وتی: دەوڵەت و خەڵکی ئێران لەتەنیشت خەڵکی تورکیاو سوریادان.
«عەلی بەهادوریی جەهرومی» وتەبێژی حکومەتی ئێران وێڕای ئاماژە کردن بە ڕوودانی بوومەلەرزە دڵتەنزێنەکەی ھەردووک وڵاتی تورکیا و سوریا، هاوکات لەگەڵ دەربڕینی هاوخەمی و سەرەخۆشی کردن لە خەڵکی دوو وڵاتە لێقەوماوەکەی دراوسێ لەتوییتێکدا نووسی: ڕووداوی دڵتەزێنی بوومەلەرزەکەی تورکیا کە بووەهۆی گیان لە دەستدانی ژمارێک لە خەڵکی وڵاتانی دۆست و دراوسێ، هۆی خەم وپەژارەی هەر مرۆڤێکی خاوەن ھەستە.
بەرەبەیانی ڕۆژی دووشەممە (٦ی فڤریە) بوومەلەرزەیەکی بەهێز باشووری تورکیا و باکوری سوریای هەژاند. لە ڕەوتی ئەم بوومەلەرزە ٧.٨ ڕێختەرییەدا، زیانێکی قورس لە باڵەخانەکان کەوت و تیمەکانی فریاگوزاری و گەڕان خەریکی لابردنی داروپەردووەکان و ڕزگارکردنی ئەو کەسانەن کە لە ژێر کەلاوەکاندا گیریان خواردووە.
ھەتا چرکەساتی بڵاوبوونەوەی ئەم هەواڵە ژمارەی ئەو کەسانەی لە تورکیا بەهۆی بوومەلەرزەکەوە گیانیان لەدەست داوە گەیشتووەتە زیاتر لە ١٠٠٠ کەس و وەزارەتی تەندروستیی سوریاش ڕایگەیاندووە کە ژمارەی ئەو کەسانەی بەهۆی بوومەلەرزەکەی ئەم وڵاتەوە گیانیان لەدەستداوە بۆ ٤٠٣ کەس ھەڵکشاوە.
