ڕێبەری مەزنی شۆڕش لە پەیامێکدا بە بۆنەی هەفتەی بەرەڤانیی پیرۆز، بە چاوخشاندنێک بە سەر ئەو ڕووداوانەی کە ژیانی خەڵکیان لە سەردەمی حکومەتی پەهلەوییەکاندا تاڵ کردبوو و بە هەڵسەنگاندنی ئەو ڕۆژانە و ئەمڕۆی گەلی ئێران، پێیداگرت: ڕۆژانی داهاتوومان گەلێک بەشکۆتر لەم ڕۆژانەمان دەبێ.

حەزرەتی ئایەتووڵلا سەید موجتەبا حسێنی خامنەیی ڕێبەری مەزنی شۆڕش و فەرماندەری گشتیی هێزە چەکدارەکان لە پەیامێکدا بە بۆنەی ساڵیادی ڕۆژانی دەسپێکی شەڕی سەپێندراوی یەکەم و بەرگریی هەشت ساڵە و مێژوویی گەلی ئێران ، بە ئاماژە بە هەوڵی زاڵێتیخوازان بۆ گەڕاندنەوەی ئێران بۆ سەردەمی دواکەوتوویی و زەلیلی و بندەستی و بەسراوەبوون و ناوزڕاوی لە ڕێگای سەپاندنی شەڕێک لە دەیەی یەکەمی شۆڕشدا، جەختی کرد: سەرباری هەموو هەوڵەکانیان، نیزامی ئیسلامی بەهێزتر و لێهاتووتر لە جاران، بە دەنگێکی بەرزتر و فڕینێکی قوقنووس ئاسا هەستایەوە و ئەمەش بوو بە تایبەتمەندیی بەردەوام و هەمیشەیی ئەم نیزامە لە ڕووداوەکانی دیکەیشدا کە سەرچاوەکەیان دەگەڕایەوە بۆ پیلانەکانی دووژمن و ئێستا ئەو قۆقنووسە بە هۆی زەخت و گوشارەکانی دوژمن و بەتایبەت دوو شەڕی سەپێندراوی ئەمدواییە ئەوەندە گەورە بووە کە سێبەری فڕینەکەی کەوتۆتە سەر خاک و وڵاتی دوژمنانیش. ڕێبەری مەزنی شۆڕش شەڕی سەپێندراوی بە یەکێک لە گرنگترین پیلانەکانی دوژمنان بۆ بەرەنگاربوونەوەی نیزامی کۆماری ئیسلامی لە ساڵانی یەکەمی شۆڕش هێنایەئەژمار و راشکاوانە فەرمووی: گەلی ئێران لە کاتێکدا دەستی دایە بەرگری کردن لە خاک و وڵاتی خۆی کە لە بواری ئیمکانات و کەرستەی پێویستەوە، کەموکوڕییەکی زۆری هەبوو؛ بەڵام بە پشت بەستن بە ئیمان، خۆڕاگری و فیداکاریی خەڵک و خەباتکاران، بەرگری کرد لە سەربەخۆیی و یەکپارچەیی خاک و  وڵاتەکەی. لە پەیامەکەی ڕێبەری مەزنی شۆڕش و فەرماندەی گشتیی هێزە چەکدارەکاندا هاتووە؛ سەردەمانێک زاڵێتیخوازان بە وەڕێخستنی شەڕی سایکۆلۆژیک و نانەوەی کەشێکی پڕ ترس و تۆقان، شەقامەکانی پێتەختیان چۆڵ کرد و کودەتایەکیان دژ بە سەربەخۆییخوازیی ئەم گەلە وەڕێخست و پاش ئەوە ٢٥ ساڵی ڕەبەق دەستیان دایە تاڵان کردنی سامانی ئەم وڵاتە؛ بەڵام ئێستا دەبینین کە ئەوە حەوت مانگە هاووڵاتیانمان مەیدان و  شەقامەکانی سەرانسەری وڵاتیان بە بەشداری بەرپرسیارانە و پڕ سۆز و خرۆشی خۆیان ڕازاندۆتەوە، بۆ ئەوەی خەباتکارانی ئیسلام دڵگەرم بن و دوژمن تەواو بتۆقێ. لە پەیامەکەی ڕێبەری شۆڕشی ئیسلامیدا هاتووە: هەروا کە زیاتر لە ٣٠ ملوێن ئێرانی ، گیانفیدابوونی خۆیان ڕاگەیاندووە و ئەو کاتەی کە بۆ ڕێکخستنیان پێویست بە سەرلەنوێ ئامادەیی دەربڕین بوو، تەنیا لە ماوەی ١٠٠ خولەکدا، زیاتر لە ٥٠٠ هەزار کەس هەموو جێگا و ئەرکە داواکراوەکانیان پڕ کردەوە. ئیستاکە لە سەرانسەری ئێرانی ئیسلامیدا کە ئێرانی لە هەموو هۆز و ئایین و ئایینزایەکەوە رازاندوویەتییەوە، ئامادەیی جۆراوجۆر راگەیاندراوە بەتایبەت ئامادەیی چەکدارانە بۆ ئەوەی کە ئەوان ناودار ببن و دوژمن ناوزڕاو.
ڕێبەری شۆڕشی ئیسلامی هەروەها بە ڕێزگرتن لە دووەم ساڵیادی شەهیدبوونی پاڵەوانی عەرەب و هێمای بەرزی بەرەی خۆڕاگری شەهید سەیدحەسەن نەسرووڵلا و ڕێزگرتن لە خۆڕاگری و خەباتی عاشوورایی شێخ نەعیم قاسم بەڕێوەبەری گشتی و هەر هەموو خەباتکارانی حیزبوڵڵای لوبنان، راشیگەیاند: ئەم ڕۆژانەی لوبنان ڕۆژانێکی درەوشاوە و پڕشانازییە بۆ هەموو خەباتکارانی خۆڕاگری و ڕۆژانێکی زەلیلکەر و لە ئاکامدا سەرشۆڕکەرە بۆ هەموو ئەو کەسانەی کە لە بەرامبەر دوژمنی زایۆنیدا چاوی هیوایان بڕیوەتە بەڵێنە درۆینەکانی زاڵێتخوازان و ناحەزانی خاک و وڵاتیان. ڕێبەری مەزنی شۆڕشی ئیسلامی هەرەها جەختیشی کرد لە سەر پێویستی بەردەوامبوونی خۆڕاگری لە لوبنان و ناوچەکەدا و فەرمووی: ئەزموونی گەلی ئێران لە سەردەمی بەرەڤانیی پیرۆز ئەوەی دەرخستووە کە خۆڕاگری و بەرخۆدان بەرامبەر بە زەخت و گوشاری دەرەوەیی دەتوانێ ببێتە هۆی پەرەسەندنی زیاتری توانا و سەربەخۆیی وڵات. ڕێبەری مەزنی شۆڕش لە کۆتاییدا جەختی کرد کە سەردەمی بەسراوەبوون ئیتر تێپەڕیوە و گەلی ئێران بەردەوام دەبێ لە سەر ڕێگای سەربەخۆیی، سەربەرزی و خۆڕاگری.