پەرەسەندنی ناڕەزایەتییەکان دژ بە جەنایەتەکانی زایۆنییەکان
وڵاتان و شارە جۆراوجۆرەکانی جیهان بونەتە گۆڕەپانی بەڕێوەچوونی خۆپیشاندانی بەربڵاو بۆ ئیدانە کردنی دەسدرێژیی ڕژێمی زایۆنی بۆ سەر غەززە و لوبنان.
هەزاران کەس لە کۆریای باشوور، ئەڵمان، ئینگلیز، تورکیا، نەرویژ، ئۆتریش، دەنیمارک و سوید لە خۆپیشاندانی داکۆکی لە غەززە و لوبنان بەشدارییان کرد. خەڵکی تورکیا لە شاری ئەستەموڵ بە بەڕێوەبردنی خۆپیشاندان داکۆکیی خۆیان لە خەڵکی فەلەستین دەربڕی و بەردەوامبوونی جەنایەتەکانی ڕژێمی زایۆنی لە کەرتی غەززەیان شەرمەزار کرد. سەدان کەس لە خەڵی ئینگلیز و ئوتریشیش بە بەڕێوەبردنی خۆپیشاندان، خوازیاری کۆتایی هاتنی هاودەستیی ئینگلیز لە ژینۆسایدی دژ بە فەلەستینییەکان لە غەززە بوون. کۆبوونەوەیەکیش لە کۆریای باشوور بەڕێوەچوو بۆ پاڵپشتی کردنی فەلەستینییەکانی غەززە لە جەنگەی ژینۆسایدی ئەمریکا و ئیسراییل لەم ناوچە گەمارۆدراوەدا. ئەم خۆپیشاندانە بە مەبەستی ڕاکێشانی سەرنجی خەڵکی جیهان بەرەو ڕەوشی کارەساتباری بە ملوێنان منداڵی فەلەستینی بەڕێوەچوو کە بە دەست برسێتییەوە دەناڵێنن. لە دوو شاری ئەڵمانیی بێرلین و دۆسێلدۆرفیشدا خۆپیشاندانی لەو چەشنە و لە ئاستێکی بەربڵاوتر بەڕێوەچوو و خۆپیشاندەران بە هەڵکردنی ئاڵای فەلەستین، لافیتەگەلێکیان گرتبوویە دەست کە لەسەریان درووشمی شەرمەزار کردنی جەنایەتەکانی ڕژێمی زایۆنی دژ بە خەڵکی فەلەستین و لوبنان نووسرابوو. چالاکانی توونسی لایەنگری فەلەستینیش بە بەڕێوەبردنی خۆپیشاندان لە بەردەم باڵوێزخانەی ئەمریکا، هاوبەشی و هاودەست بوونی واشینگتۆن لە جەنایەتەکانی ڕژێمی زایۆنی دژ بە خەڵکی فەلەستین و لوبنانیان شەرمەزار کرد. جەنایەتە بێسنوورەکانی ئیسراییل دژ بە فەلەستینییەکان و بایەخ نەدانی ڕژێمی ژینۆسایدکار بە داخوازە نێودەوڵەتییەکان، کاردانەوەی بەربڵاوی لە سەرانسەی جیهاندا بەداوە بووە.
