قەسام: گیانی دوو دەستبەسەرکراوی زایۆنی لە مەترسیدایە
گوردانەکانی قەسام لقی سەربازیی بزووتنەوەی حەماس ڕایگەیاند بەهۆی پەلامارە قورسەکانی ڕژێمی زایۆنی بۆ سەر شاری غەززە، پێوەندیی نێوان ئەم گوردانانە و دوو دەستبەسەرکراوی زایۆنی پچڕاوە و گیانیان لە مەترسیدایە.
گوردانەکانی قەسام لقی سەربازیی بزووتنەوەی حەماس ئەمڕۆ یەکشەممە ڕایانگەیاند کە دوابەدوای پەلامارە قورسەکانی ڕژێمی زایۆنی بۆ سەر گەڕەکەکانی ئەسەبرە و تەلولهەوا لە ماوەی ٤٨ کاتژمێری ڕابردوودا، پێوەندیی نێوان ئەم گوردانانە و دوو دەستبەسەرکراوی زایۆنی بەناوی "عەمری میران" و "متان ئەنغەریست" پچڕاوە و گیانیان لە مەترسیدایە. قەسام وتیشی: هێزی داگیرکەر دەبێت خێرا پاشەکشە بکەن بۆ باشووری شەقامی ژمارە ٨ و پەلامارەکانیشیان بۆ ماوەی ٢٤ کاتژمێر لە کاژێر ٦ی ئێوارەوە بوەستێنن تا ئەم گوردانانە بتوانن گیانی ئەم دوو دەستبەسەرکراوە زایۆنییە ڕزگار کەن و لەژێر داروپەردووی باڵاخانە ڕووخاوەکان دەریانبێنن. قەسام وشداری دا: ئێمە هەموو شتێکمان ڕاگەیاندووە و هیچ بیانووێک قەبووڵ ناکەین.
