ڕێکخراوەی نەتەوەکان لە کاردانەوەیەک دا بەرامبەر بە ھەمگاوەکەی ژنراڵ «خەلیفە حەفتەر» لە مەڕ خۆناساندنی وەک دەستەڵاتداری لیبی، وتی: تەنیا دەوڵەتی ھاوپەیمانیی نیشتیمانیی لیبی بە فەرمی دەناسێت، نەک کەسێکی دیکە.

بەپێی ڕاپۆرتی ھەواڵدەریی فارس،«ستیفان ڤیلیامز_Stephanie Williams » ناردراوی تایبەتیی ڕێکخراوەی نەتەوەکان بۆ کاروباری لیبی بە ھەواڵدەریی فەرمیی ئاڵمانیای ڕاگەیاندووە کە ڕۆژی سێ شەممە لەگەڵ «فائیز سەڕاج» سەرۆکی دەوڵەتی ھاوپەیمانیی نیشتیمانیی لیبی بە تەلەفۆن قسەی کردووەو سەبارەت بە گۆڕانکارییەکانی ئەم دواییەی لیبی پێکەوە دواوون.

«ڤیلیامز» وێڕای پشتگری کرئن لە دەوڵەتی سەڕاج بە پێی ڕێککەوتنی «سۆخیرات» وتیشی: ھەرچەشنە ئاڵ و گۆڕێکی سیاسی لە لیبی دا دەبێ لە ڕێگای دیموکراسییەوە مسۆگەر بکرێت.

ژنراڵ خەلیفە حەفتەر سەرکردەی ھێزەکانی ناسراو بە «سوپای نیشتیمانی» شەوی سێ شەممە ٢٧ی ئاپریل لە لێدوانێکی تەلەفزیۆنی دا خۆی وەکو دەستەڵاتداری لیبی ناساندو ڕێککەوتنی ساڵی ٢٠١٥ ناسراو بە «سوخیرات»ی بە ھەڵوەشاوە لە قەڵەم دا.

ڕێککەوتننامەی «سوخیرات» لە نێوان ھەردووک لای تێکھەڵچوو لە لیبی و بە ئامادە بوونی نوێنەری ڕێکخراوەی نەتەوە یەکگرتووەکان و کۆمەڵێک لە نوێنەرانی وڵاتانی عەرەبی و ڕۆژئاوا واژۆ کرا کە ئەمەش پێکھاتنی ئەنجومەنی سەرۆکایەتی و دەوڵەتی یەکگرتنی نیشتیمانیی لێ کەوتەوە، بەڵام ماوەیەک دوای ئەوە ژنراڵ حەفتەر ڕایگەیاند کە ئەم ئەنجومەنەو دەوڵەتی فائیزسەڕاج نایاساییە.