هاووڵاتیانی ئۆردۆنی لەشاری ئەربوودی باکوری وڵاتەکەیان خۆپیشاندانێکی بەربڵاویان بەئاراستەی لایەنگری لە فەلەستین و شەرمەزارکردنی تیرۆری شەهید ئیسماعیل هەنیە لەلایەن ڕژیمی زایۆنیستیەوە بەڕێوە برد.

خۆپیشاندەرە  ئۆردۆنیەکان بەدانی درۆشم بەدژی ڕژیمی زایۆنیست و دڕندەکاریەکانی پێداگریشیان کرد لەسەر درێژەدانی ڕێبازی شەهید ئیسماعیل هەنیە و خۆڕاگری لە بەرامبەر ئەو ڕژیمەدا.

ئەوەش لەکاتێکدایە کە ڕۆژی ڕابردوو ئیمەن سەفدی وەزیری دەرەوەی ئەو وڵاتە ڕایگەیاندبوو کە زایۆنیستەکان بە تیرۆری شەهید هەنیە هەوڵی نێوبژیوانەکانیان بۆ جێگیرکردنی ئاگربڕ لە غەزە ناکام کردوە.

سەفدی دوێنی پێنج شەم لەمیانەی گوتارێک ڕایگەیاندبوو کە کۆمەڵگەی نێودەوڵەتی پێویستە بەجۆرێک بجوڵێتەوە کە دەستدرێژکاری ڕژیمی زایۆنیست کۆنتڕۆڵ بکرێ و وێرای ئاماژە بە  تیرۆری شەهید هەنیە وتبووی ئەو دڕندەکاریە نیشاندەری پێشێلی ئاشکرای یاسا نێودەوڵەتیەکان و دەسەڵاتداری وڵاتانە.