بارزانی و ئەردوغان پێکەوە کۆبوونەوە
«بارزانی» سه‌رۆکی هه‌رێمی کوردستان ڕۆژی پێنجشه‌ممه به‌سه‌ردانێک گه‌ییشته ئه‌نقه‌ره و له‌گه‌ڵ «ره‌جه‌ب ته‌یب ئه‌ردوغان» سەرۆک کۆماری تورکیا کۆبووه‌وەو له‌کۆبوونه‌وه‌که‌شدا، گفتوگۆ له‌باره‌ی په‌یوه‌ندییه‌کانی هه‌ولێر و به‌غدا و چاره‌سه‌ریی کێشه‌کانی نێوان هه‌ردووک لا کرا.
بە پێی ڕاپۆرتی کەناڵی ئاسمانیی سەحەر بە گێڕانەوە لە میدیاکانی ھەرێمی کوردستان، به‌گوێره‌ی راگه‌یه‌ندراوێکی سه‌رۆکایه‌تی هه‌رێمی کوردستان، له کۆبونه‌وه‌که‌ی نێوان «بارزانی» و «ئەردوغان» په‌یوه‌ندییه‌کانی عێراق و هه‌رێمی کوردستان له‌گه‌ڵ تورکیا، دۆخی سیاسیی عێراق و هه‌رێمی کوردستان، به‌تایبه‌تی دوای ده‌ستبه‌کاربوونی کابینه‌ی نوێی حکومه‌تی فیدراڵیی عێراق، په‌یوه‌ندییه‌کانی هه‌ولێر ـ به‌غدا و گفتوگۆی چاره‌سه‌رکردنی کێشه‌کانی نێوانیان و ده‌رفه‌ته‌کانی هاریکاریی عێراق و هه‌رێمی کوردستان له‌گه‌ڵ تورکیا له بواری وزه‌دا، تاوتوێکران.
هه‌ر به‌گوێره‌ی راگه‌یه‌ندراوه‌که‌ی سه‌رۆکایه‌تی هه‌رێم، هه‌ردوولا جه‌ختیان له خواستی دولایه‌نه بۆ بره‌ودان به په‌یوه‌ندییه‌کانی هه‌رێمی کوردستان و تورکیا له هه‌موو بواره‌کاندا کرده‌وه، به‌تایبه‌تیش بواری بازرگانی و ئابوری و سودوه‌رگرتن له‌و ده‌رفه‌تانه‌ی بۆ فراوانکردنی هاریکاریی هاوبه‌شی عێراق و هه‌رێمی کوردستان له‌گه‌ڵ تورکیا له بواری وزه‌دا هاتوونه‌ته ئاراوه که ده‌کرێت ڕۆڵی کارای هه‌بێت له پڕکردنه‌وه‌ی ئه‌و بۆشایی و پێویستییه‌ی ئه‌مڕۆ له جیهان و به‌تایبه‌تی له ئه‌وروپا له بواری وزه و گازی سروشتیدا دروست بووه.
سه‌رۆکایه‌تی هه‌رێم ئاماژه‌ی به‌وه‌ش کردووه، گرنگیی پته‌وکردنی هاریکاری و هه‌ماهه‌نگیی عێراق و هه‌رێمی کوردستان له‌گه‌ڵ تورکیا بۆ پاراستنی ئاسایشی سنوور، دوایین پێشهاته‌کانی شه‌ڕی دژی تیرۆر و مه‌ترسییه‌کانی داعش له عێراق و سوریا، دۆخی ناوچه‌که به‌گشتی و چه‌ند پرسێکی دیکه‌ی جێی بایه‌خی هاوبه‌ش، ته‌وه‌رێکی دیکه‌ی کۆبونه‌وه‌که‌ی نێوان ھەردووک سەرکردەکە بوون.
