دوو گرووپی تیرۆریستیی سەر بە تورکیا واتە بەرەی شام  و ئەحرار شام لە پارێزگای حەلەب پێکیان دادا و تا ئێستا ٢٢ کەس کوژراون و بریندار بوون.

بە گوێرەی ماڵپەڕی هەواڵی نۆرس پرێس، شەڕ و پێکدادان لەنێوان بەرەی شام و ئەحرار شام  لە ناوچەی ئەلباب لە بەشی ڕۆژهەڵاتی پارێزگای حەلەب لە باکوری سوریا بەردەوامە و ژمارەی کوژراو و بریندارەکانیش لە زیادبووندایە . 

ڕۆژنامەی نۆرس پرێس لە زاری سەرچاوەیەکی تایبەتەوە بڵاویکردەوە، لایەنەکان مەودای گرژییەکان زیاد دەکەن؛ لە ئەنجامی هێرشەکان دا حەوت کەس کوژراون کە دوو کەسیان مەدەنی بوون و ١٥ کەسی دیکەش برینداربوون کە چواریان منداڵن.

بە وتەی سەرچاوەکە لەم پێکدادانانەدا چەکی قورس و تانک بەکاردەهێنرێت. 

بە پێی ئەم ڕاپۆرتە، گرووپێکی ئەندامانی ئەحرار شامیش لە شارۆچکەی عەبلە لە دەوروبەری ئەلباب خۆیان ڕادەستی بەرەی شام کردووە.

 ئەو ناوچانەی لە باکووری سووریا کە لەلایەن تیرۆریستانی سەر بە تورکیاوە داگیرکراون، شایەتی نائەمنی و ململانێی ناوخۆیین.