بەهۆی شەپۆلێکی بارانبارینی بەخوڕ لە سنووری پارێزگای ئیدلب لە سووریا، زیاتر لە ١٠ کەمپی ئاوارەکان ژێرئاو کەوتوون، نەخۆشخانەیەک چۆڵکراوە و قوتابخانە و مزگەوتەکان بۆ داڵدەدانی لێقەوماوان کراونەتەوە.

 محەممەد عەبدوڕەحمان، پارێزگاری ئیدلب رایگەیاند: "سەرجەم لایەنە پەیوەندیدارەکانمان راسپاردووە رێوشوێنی بەپەلە بۆ پاراستنی هاووڵاتییان و دابینکردنی پێداویستییەکانیان بگرنەبەر، ژمارەیەک قوتابخانە و مزگەوت وەک پەناگەی کاتی بۆ پێشوازیکردن لەو خێزانانە کراونەتەوە، تیمەکانی کاروباری کۆمەڵایەتیش دەستیان کردووە بە گەیاندنی هاوکاریی فریاگوزاری.

رائید ساڵح، وەزیری باری نائاسایی و کۆنترۆڵی کارەسات لە سووریا رایگەیاند، تیمەکانی بەرگریی شارستانی بەردەوامن لە بەدەمەوەچوونی لێکەوتەکانی بارانەکەی پارێزگای ئیدلب و ئەو لافاوانەی لێی کەوتوونەتەوە.