وتەبێژی وەزارەتی درەوەی ئێران وتی: هاڕەی وردوخاش بوونی ئێسک و پروسکی زایۆنیزمی جیهانی زیاتر لە هەر کات و ساتی دیکە بەرگوێ دەکەوێ.

"ناسر کەنعانی" وتەبێژی وەزارەتی درەوەی ئێران بە ئاماژە بە سەرکوتکرانی پڕتووند و تیژی خۆپیشاندانی خوێندکارانی زانکۆکانی ئەمریکا و ئەرووپا بۆ پاڵپشتی کردنی خەڵکی مەزڵوومی فەلەستین پێیداگرت؛ ئیتر پێش بە داڕمانی کۆڵەکە قەڵشاو و درزبردووەکانی داگیرکەری زایۆنی لە فەلەستین ناگیردرێ؛ بۆیە نا بە داگیرکاری لە فەلەستین و نا بە ژینۆساید لە کەرتی غەززە و هاوار بۆ ڕزگاریی فەلەستین، ئەمڕۆ بووە بە داخوازێکی جیهانی.

خۆپیشاندانی خوێندکارانی زانکۆکانی ئەمریکا بۆ پاڵپشتی کردنی فەلەستین و شەرمەزار کردنی جەنایەتەکانی ڕژێمی ژینۆسایدکاری زایۆنی کە  لە زانکۆی کۆلۆمبیای شاری نیۆیۆرکەوە دەست پێبوو، سەرباری سەرکوت کرانی لە لایەن کاربەدەستانی ئەمریکاییەوە کێشرایە زانکۆکانی دیکە لەوان ییەڵ، نیۆیۆرک، هاروارد، تێگزاس و کالیفۆرنیای باشوور و لە درێژەدا، شەپۆلی ئەو خۆپیشاندانانە، زانکۆکانی وڵاتانی دیکەی ڕۆاژوایی، لەوان فەرەنسا، ئەڵمان، کەنەدا، بەریتانیا و ئۆسترالیای گرتەوە.