نەخۆشی کەڕوویی لە ناو دەمدا لەبەر چی دەردەکەوێت؟
نەخۆشی کەڕوویی (کاندیدیاسس Candidiasis) بەهۆی جۆرەھا بارودۆخی جیاوازی ژینگەیی و فیزیۆلۆژی دەتوانێت گەشە بکات.
هۆکاری ئەم جۆرە نەخۆشییە جۆرێ زیندەوەری مایکرۆسکۆپییە کە ئاسایی لە دەمی زۆربەی کەسە ساغەکانیشدا هەیە؛ کاتێک کە بەهۆی کاریگەری هەندێ هۆکاری جیاواز یان گۆڕانی باری ناو دەم، ژمارەی ئەم جۆرە زیندەوەرانە زیاد دەکات ئەم جۆرە نەخۆشییە دەردەکەوێت.
هەندێ هۆکار ڕێخۆشکەر دەبن بۆ پەیدابوونی ئەم نەخۆشییە:
- بەکارهێنانی دەرمانی دژە زیندەیی بەهێز (Anti biotic).
- بەکارهێنانی لەڕادەبەدەری گیراوەی ناودەم شۆردنی دژە میکرۆب.
- وشکی ناو دەم.
- تاقمی ددانی دەستکرد وە ئەو تەل و شتومەکانەی لە ددان ڕاستکردنەوەدا بەکار دێن.
- کێشانی جگەرەی لەڕادەبەدەر.
- تیشکی ئێکس کە بەکاردێت بۆ چارەسەر لە ناوچەی سەر و مل.
- جۆرەکانی نەخۆشییە لاواز کەرەکان وەک (شەکرە، شێرپەنجەی خوێن، کەم خوێنی).
- لاواز بوونی کۆئەندامی بەرگری لەش
ئەم نەخۆشییە لە تازەبووەکان و بەساڵاچووەکاندا زیاترە و پەرە دەسێنێ. هەروەها لە کاتی سکپڕیدا ئەگەری دەرکەوتنی ئەم جۆرە نەخۆشییە زیاتر دەبێت.
