وەزارەتی بەرگریی تورکیا ڕایگەیاند: سەربازێکی تورکیا لە ناوچە سنوورییەکانی باکووری عێراق و تورکیا کوژراوەو سێی دیکەش بریندار بوونە.

وەزارەتی بەرگریی تورکیا لە بەیاننامەیەکدا ڕایگەیاندووە کە سەربازێکی تورکیا لە ناوچە سنوورییەکانی باکووری عێراق و تورکیا کوژراوەو سێی دیکەش بریندار بوونە. وەک باسیشی کردووە  سەربازەکە لە رووبەڕووبونەوەی لەگەڵ چەکدارانی پەکەکە کوژراوە.

ھەواڵدەرییەکانی تورکیا باسی ئەوەشیان کردووە کە لەو رووبەڕووبوونەوەیەدا، پێنج چەکداری پەکەکەش کوژراون.

مانگی شەشی ئەمساڵ، تورکیا ئۆپەراسیۆنی «چنگی هەڵۆ» و «چنگی پڵنگی» دژی پەکەکە راگەیاند، کە بە گووتەی خۆیان بۆ پاراستنی سنوورەکانیانە لە چەکدارانی پەکەکە.

بەهۆی جەنگی نێوان سوپای تورکیا و پەکەکە لە ناوچە سنورییەکانی هەرێمی کوردستان و تورکیا، دەیان گوند چۆڵ کراون و چەندین هاووڵاتیی مەدەنی هەرێمی کوردستانیش گیانیان لەدەست داوە.