مەراڵ ئاکشەنەرە لە دیاربەکر: ئیتر باسی تورک و کورد لە تورکیادا نەماوە
مەراڵ ئاکشەنەر ڕێبەری «چاک پارتی» ، ئامانجی گەشتەکەی بۆ دیاربەکر بەدەست هێنانی ڕەزامەندیی خەڵکی ئەم شارە ڕاگەیاند.
«مەراڵ ئاکشەنەر» ڕێبەری «چاک پارتی» و یەکێک لە گرینگترین کەسایەتییەکانی شەشە ئۆپۆزسیۆنەکەی تورکیا لە لێدوانێکدا لە شاری دیاربەکر وتی: بۆ بەدەستهێنانی ڕەزامەندیی خەڵکی شارەکە سەردانی ئەم پارێزگایەی کردووە.
ناوبراو لە وتاردانەکەیدا جەختی لەوەش کردەوە، «چاک پارتی» لە لایەن ڕۆڵەکا باشەنی ئەم وڵاتە بە تورک و کورد و زازاوە، پێکهاتووە و ئیتر باسی تورک و کورد لە تورکیا لە ئارادا نییە.
«ئاکشەنەر» لە درێژەی قسەکانیدا لە نێو ئاپۆڕەی خەڵکی دیاربەکەر بە ئاماژە بە ڕەوشی نالەباری ئابووریی تورکیا وتی: حکومەتی پارتی داد و گەشە هەموو خەڵکی بە یەک ڕادە نوقمی چەرمەسەری و برسێتی کردووە و ئەمڕۆ لە وڵاتی ئێمەدا ئیتر باسی دابەشکرانی خەڵک بە تورک و کورد یان چەپ و راست لە ئارادا نییە، بەڵکوو وڵاتەکەمان دابەش بووە بە سەر دوو گرووپی ئاکەپە و خەڵکانی تر. ناوبراو لە درێژەی قسەکانیدا وتیشی: ئایدۆلۆژیای ئاکەپە ئەوەیە کە خۆی بە ئاغا و خەڵک بە گزیر دەزانێ. سیستەمێک لە تورکیا دەسەڵاتی بە دەستەوەیە کە باش دەزانێ چۆن بە گۆپاڵ و ترساندن حکومەت بکات.
ڕێبەری «چاک پارتی» لە کۆتاییدا بە ئاماژە بە مەتەڵێک، حکومەتی ئاکەپەی بە گرووپێک ناو برد کە لەگەڵ گورگ تێر دەخۆن و لەگەڵ شوانیش تێر دەگرین و وتیشی:گەلی ئێمە بەرامبەر بەم زوڵم و زۆرە ڕادەوەستن. ئێمە هاتووین تا ئەم زوڵم و زۆرە بنەبڕ بکەین.
