دەیان هەزار مامۆستا، قوتابی و خوێندکار لە ئیسپانیا، بۆ دەربڕینی ناڕەزایەتی بە بارودۆخی پەروەردەو خوێندن، مانیان گرت و ناڕەزایەتییان دەربڕی.

ناڕازییانی مەدرید خوازیاری زیادکرانی مووچەی مامۆستایان، کەمکرانی کاتژمێری کارکردنی مامۆستاکان، گەورەترکرانی پۆلەکانی دەرس و زیادکرانی بودجەو وەبەرهێنان لە قوتابخانەو خوێندنگەکانن. ئەو ناڕەزایەتییانە پاش چەند مانگ ڕاوێژی ناسەرکەوتوو لەگەڵ دەوڵەتی خۆجێی مەدرید بەڕێوە چوو کە تێکهەڵچوونی نێوان خوێندکاران و پۆلیسی لێکەوتەوە. لە ئەنجامی ئەو گرژیی و ئاڵۆزییانەدا، لانیکەم پێنج کەس دەسبەسەرکران و حەوت کەسیش لەوان ژومارێک پۆلیس، بریندار بوون.

سەندیکاکانی پیشەیی، کەمیی بودجەو هێزی مرۆیی لە کێشە سەرەکییەکانی سیستەمی فێرکاریی گشتیی ناوچەی مەدرید لەقەڵەم دەدەن.